ممبئی(این این آئی)بولی وڈ کے خوبرو اداکار ہریتھک روشن کی کامیاب سپر ہیرو فلم سیریز ’کرش‘ کے چوتھے حصے پر کام جاری ہے، جس میں ولن کے کردار کے لیے اداکار نوازالدین صدیقی کا نام سامنے آیا ہے،لیکن خود ور سٹائل اداکار نواز الدین صدیقی اور فلم ساز اور ہدایت کار راکیش روشن نے اس کی تصدیق نہیں کی۔ہریتھک روشن آج کل ’’سپر30‘‘کی شوٹنگ میں مصروف ہیں جو بہار سے تعلق
رکھنے والے ریاضی دان آنند کمار کی زندگی پر بنائی جارہی ہے ۔فلم کو 2018میں ریلز کرنے کا اعلان پہلے ہی سامنے آچکا ہے ،فلم کی ہدایت کاری اس باروکاس باہل دے رہے ہیں جو اس سے قبل’’کوئین ‘‘اور ’’چلر پارٹی ‘‘کی ہدایات کا ری کے فرائض انجام دے چکے ہیں۔خیال رہے کہ نوازالدین صدیقی نے سلمان خان کی کامیاب فلم ’کک‘ میں ولن کا دلچسپ کردار ادا کیا تھا،اس کے علاوہ انہوں نے ’’بدلہ پور‘‘میں کمال اداکاری سے ایک منفرد نام کمایا تھا۔ان کے اس کردار سے امید کی جاسکتی ہے کہ وہ فلم ’کرش 4‘ کے ساتھ بھی انصاف کریں گے۔واضح رہے کہ فلم ’’کرش‘‘ 2006 میں ریلیز ہوئی یہ ہریتھک روشن کی 2003 میں ریلیز ہونے والی فلم ’’کوئی مل گیا‘‘ کا سیکوئل تھی اس کے بعد ’’کرش 3‘‘ 2013 میں ریلیز ہوئی۔
