اسلام آباد، لاہور(مانیٹرنگ ڈیسک، این این آئی)نجی ٹی وی چینل کے مزاحیہ شو کی میزبان عائشہ جہانزیب کی دوبارہ واپسی ہو گئی ۔ ذرائع کے مطابق ٹی وی اینکر پرسن عائشہ جہانزیب نے بعض ذاتی مصروفیات کی وجہ سے عارضی طو رپر نجی ٹی وی چینل کے مزاحیہ شو کی میزبانی سے کنارا کشی اختیار کر رکھی تھی مگر مصروفیات ختم ہونے کے بعد انہوں نے دوبارہ مزاحیہ شو کی میزبانی شروع کر دی ہے۔
واضح رہے کہ اس سے پہلے نجی ٹی وی جیونیوز نے اپنے پروگرام خبرناک کی آفتاب اقبال کے بعد بطور میزبان ذمہ داریاں سنبھالنے والی عائشہ جہانزیب کو ایک ماہ کی جبری رخصت پر بھیج دیا تھا اورمعروف صحافی و تجزیہ کار نجم سیٹھی کی اہلیہ جگنو محسن جو کہ خود بھی ایک صحافی ہیں کو پروگرام کی میزبان کے طور پر ذمہ داریاں دے دی گئی تھیں۔اس صورتحال میں کچھ دن خاموش رہنے کے بعد عائشہ جہانزیب نے منظرعام پر آتے ہوئے سوشل میـڈیا کی ویب سائٹ فیس بک لائیو پر آکر اپنے مداحوں کے سوالات کا جوابات دئیے تھے۔ انہوں نے سوالات کے دوران گاہے بگاہے اس تبدیلی کی وجوہات سے بھی پردہ اٹھایاتھا۔ ان کا کہنا تھا کہ جیو انتظامیہ نے مجھ سے ایک ماہ کی رخصت پر جانے کا کہا اور پروگرام کی میزبانی کے فرائض سے ہٹا دیا۔ میں کسی چھینا جھپٹی کا حصہ نہیں بنوں گی۔ ایک سوال کا جواب دیتے ہوئے انہوں نے اپنے مداحوں سے اپیل کی تھی کہ وہ سوشل میڈیا یا کسی اور جگہ اپنے جـذبات کو قابو میں رکھیں اور کوئی ایسی بات نہ کریں جو بدتمیزی اور بدتہذیبی کے زمرے میں آتی ہے۔ ان کا کہنا تھا کہ وہ اداکاری کی فیلـڈ میں آئیں گی یا نہیں اس کا فیصلہ ابھی انہوں نے نہیں کیا ، آنے والا وقت اس حوالے سے فیصلہ کرنے کی راہیں ہموار کرے گا جبکہ کسی اور چینل پر کسی دوسرے شو کی میزبانی کے حوالے سے ان کا کہنا تھا کہ ہو سکتا ہے کہ وہ ایک ماہ بعد اس حوالے سے فیصلہ کرنے میں آزاد ہوں۔ انہوں نے اپنے مداحوں کو کہاتھا کہ وہ جیو ٹی وی انتظامیہ کو اپنے تاثرات سے آگاہ کریں شاید ہو سکتا ہے کہ اس سے ان کو واپس بلا لیا جائے ۔
