لاہور ( این این آئی) اداکار ببرک شاہ نے ہالی ووڈ میں ڈائریکشن کی پیشکش قبول کر لی ،معاہدے کے لئے عنقریب انگلینڈ جائیں گے ۔ ذرائع کے مطابق انگلینڈ کے تعلق رکھنے والے ہالی ووڈفلم پروڈیوسر مائیکل انتھونی نے اداکار ببرک شاہ کی فلم ’’ مولا وے ‘‘ میں ان کی ڈائریکشن سمیت دیگر شعبوں میں کام کرنے کی صلاحیتوں کو دیکھتے ہوئے ان کو اپنی فلم میں بطور ڈائریکٹر کام کرنے کی پیشکش کی تھی
جس پر کافی غور کرنے کے بعد ببرک شاہ نے حامی بھر لی اور اب وہ معاہدے کو حتمی شکل دینے کے لئے عنقریب انگلینڈ روانہ ہوں گے ۔ واضح رہے کہ اداکار ببرک شاہ نے اپنے فنی کیریئر میں اب تک 107فلموں میں اداکاری کے جوہر دکھائے اور اپنی آخری فلم میں انہوں نے 22شعبوں میں کام کرکے ایک عالمی ریکارڈ بھی قائم کیا ۔ فلم میں انہوں نے رائٹر ، ڈائریکٹر ، پروڈیوسر ، اداکار اور کیمرہ مین کے ساتھ دیگر شعبوں میں بھی کام کیا ۔
