ممبئی(آئی این پی) بالی ووڈ کے لیجنڈ اداکاررجنی کانت کی فلم ’’کبالی‘‘ نے باکس آفس پردھوم مچادی ہے اور سب سے زیادہ برنس کرنے کے ساتھ فلم انڈسٹری کا 100 سالہ ریکارڈ بھی توڑ دیا ہے۔بھارتی میڈیا رپورٹس کے مطابق لیجنڈری اداکاررجنی کانت کی فلم ‘‘کبالی’’ دیکھنے کے لیے ان کے مداحوں کا تانتا بندھا ہوا ہے اور اب تک فلم 650 کروڑروپے کما کرسال کی سب سے زیادہ بزنس دینے والی فلم بن چکی ہے۔ فلم کبالی نے بھارت میں 211 کروڑاوربیرون ممالک انگلینڈ، جاپان اورملیشیا سمیت دیگر ممالک میں 259 کروڑ کمائے جب کہ فلم نے ریلیز سے قبل ہی سیٹلائٹ اورڈسٹری بیوشن کے مالکانہ حقوق کی مد میں 200 کروڑکمالیے تھے جس کے بعد ریلیز سے قبل سب سے زیادہ کمائی کرنے والی یہ بھارتی فلم بن گئی تھی جب کہ اب یہ فلم 700 کروڑ کمانے کی جانب تیزی سے گامزن ہے۔فلم کے پروڈیوسر ایس تھنو کا کہنا ہے کہ وہ اپنی زندگی میں ان دنوں کو نہیں بھولیں گے، فلم کی ریلیز نے انہیں بہت زیادہ خوشی دی ہے جب کہ اس فلم نے انڈسٹری کا 100 سالہ ریکارڈ بھی توڑ دیا ہے۔ انڈسٹری کے ذرائع کے مطابق فلم کا بجٹ 75 کروڑ تھا جب کہ فلم میں مرکزی کردارادا کرنے والے لیجنڈ اداکار رجنی کانت نے اپنے کردارکے لیے 50 سے 60 کروڑ کے درمیان معاوضہ لیا ہے۔