لاہور +ممبئی(مانیٹرنگ ڈیسک) فرانس کے قومی دن کے موقع پر جنوبی شہر نیس میں آتش بازی کے مظاہرے کے دوران ایک ٹرک ڈرائیور نے وہاں موجود افراد کو ٹرک کے نیچے کچل دیا، جس کے نتیجے میں 84 افراد ہلاک جبکہ متعدد زخمی ہوئے۔اس واقعے کے بعد شوبز کی مشہور شخصیات نے سماجی رابطے کی ویب سائٹ ٹوئٹر پر اپنے غم و غصے کا اظہار کرنے کے ساتھ ساتھ متاثرہ خاندانوں کے لیے دعا بھی کی۔پاکستانی اداکارہ ماہرہ خان نے فرانس واقعے پر گہرے دکھ کا اظہار کیا۔اداکارہ ماورا حسین کا کہنا تھا کہ ’دنیا میں جہاں کہیں بھی دہشت گردی ہورہی ہے میں اس کی مذمت کرتی ہوں۔بولی وڈ ستاروں نے بھی فرانس واقعے کے خلاف کھل کر بات کی اور واقعے کی مذمت کرنے کے ساتھ ساتھ متاثرہ خاندانوں سے یکجہتی کا اظہار کیا۔شاہد کپور کا کہنا تھا کہ ’شرم کی بات ہے، یہ کام کرنے والا ڈرپوک ہے، جو انسان نہیں ہوسکتا۔انوشکا شرما نے کہا ’دل توڑنے والی خبر اور مزید کتنی بار ہم لوگ انسانیت کے ساتھ ایسا ہوتے دیکھیں گے، غصے کو بیان کرنا مشکل ہے۔ہدایت کار کرن جوہر کے مطابق ’یہ کتنی افسوسناک خبر ہے، ان مظلوم زندگیوں کے لیے دعائیں۔بپاشا باسو نے بھی گہرے دکھ اور غم کا اظہار کیا۔ہدایت کار ساجد خان نے اپنے غم کا اظہار کرتے ہوئے کہا ’دکھ کی بات ہے، متاثرہ خاندانوں کے لیے دعاگو ہوں۔اکشے کمار کا کہنا تھا کہ ’صبح اٹھتے ہی ایسی خبر سننا نہایت دکھ کی بات ہے، میں وہاں گزشتہ سال موجود تھا، وہ جگہ اور وہاں کے لوگ خوبصورت ہیں، سب کے لیے دعائیں کررہا ہوں۔