کیلی فورنیا (مانیٹرنگ ڈیسک)پیغام رسانی کی سب سے بڑی موبائل ایپلیکشن واٹس ایپ نے صارفین کو مزید سہولیات دینے کے لیے مختلف نئے فیچرز پر کام شروع کردیا۔ موبائل فون کی معروف مسیج ایپلیکشن واٹس ایپ کے دنیا بھر میں کروڑوں صارفین موجود ہیں جن کو سہولیات اور آسانیاں فراہم کرنے کے لیے کمپنی مختلف اوقات میں نت نئے فیچرز اور سروسز متعارف کرواتی رہتی ہے۔
واٹس ایپ پر نظر رکھنے والے ادارے ’ڈبلیو اے بیٹا انفو‘ کے مطابق واٹس ایپ نے وکیشن موڈ اور لنک اکاؤنٹس پر کام شروع کردیا جو اینڈرائیڈ، آٗی او ایس اور ونڈوز فون رکھنے والے صارفین کے لیے جلد متعارف کروایا جائے گا۔ وکیشن موڈاطلاعات کے مطابق کمپنی نے ملازمت پیشہ افراد کے لیے خصوصی طور پر وکیشن موڈ نامی فیچر متعارف کروانے کا فیصلہ کیا، یعنی انہیں چھٹی کے روز واٹس ایپ کے جھنجھٹ سے نجات مل جائے گی۔ ڈبلیو اے بیٹا انفو کے مطابق اس فیچر کے تحت صارف کو Silent Modeکا بٹن دیا جائے گا، اگر وہ اسے آن کردے گا تو وہ آنے والے پیغامات سے عاجز نہیں آئے گا کیونکہ یہ موبائل Silent ہوگا اور اُسے نوٹی فکیشن بھی نظر نہیں آئیں گے۔ صارف کے پاس اس فیچر کو اپنی مرضی سے کھولنے اور بند کرنے کا اختیار ہوگا، جب فیچر آن ہوگا تو تمام آنے والے ان باکس کے بجائے آرکائیو میں نظر آئیں گے جنہیں بعد میں ایک ساتھ چیک کیا جاسکے گا۔ لنک اکاؤنٹ کمپنی کی جانب سے یہ فیچر صرف ’واٹس ایپ بزنس’ استعمال کرنے والے صارفین کے لیے ہوگا، یعنی صارف بیک وقت ایک ہی ایپلیکشن کے ذریعے دو سوشل میڈیا پلیٹ فارم استعمال کرسکے گا۔ یاد رہے کہ واٹس ایپ کی جانب سے آئے روز صارفین کے لیے نت نئے فیچرز متعارف کرائے جاتے ہیں، گزشتہ روز کمپنی نے صارفین کی خواہشات کو مدنظر رکھتے ہوئے ’ڈیلیٹ فار ایوری ون‘ فیچر میں بڑی تبدیلی کی جس کے تحت اب صارف بھیجے جانے والے پیغام کو 13 گھنٹے تک ڈیلیٹ کرسکتا ہے۔
