جوہانسبرگ (مانیٹرنگ ڈیسک) سائنسدانوں کا کہنا ہے کہ انھیں جنوبی افریقہ کی ایک غار سے ملنے والے ایک قدیم انسانی فوسل سے سرطان کے اولین شواہد ملے ہیں۔برطانوی نشریاتی ادارے کے مطابق تقریباً 17 لاکھ سال پرانے ایک قدیم انسان کے پاؤں کی انگلیوں میں تیزی سے بڑھنے والی رسولی کے شواہد ملے ہیں۔یہ پاؤں کی ہڈی ایک ابتدائی دور کے انسان کی ہے اور سائنسدانوں کا خیال ہے کہ اس کا شمار سائنسی اصطلاح میں ہومو اوگیسٹر یا پرانتھروپس روبسٹس میں ہوتا ہے۔یونیورسٹی آف وٹواٹرزرینڈ کے محقق ایڈورڈ اوڈز کا کہا ہے کہ ’جدید میڈیسن میں یہ سمجھا جاتا ہے کہ انسانوں میں سرطان اور رسولیوں کی بیماریاں جدید طرز زندگی اور ماحول کی وجہ سے پیدا ہوتی ہیں۔ ہماری تحقیقات یہ ظاہر کرتی ہیں کہ ان بیماریوں کی بنیادیں لاکھوں سال پہلے ہمارے آباؤ اجداد میں موجود تھیں جب جدید صنعتی معاشروں کا وجود بھی نہیں تھا۔اس سے قبل بھی دریافت ہونے والی انسانی باقیات میں رسولیاں مل چکی ہیں جن میں ایک لاکھ 20 ہزار سال قبل روئے زمین پر بسنے والی نینڈرٹل انسانوں میں ملنے والی رسولیاں سب سے قدیم سمجھی جاتی ہیں۔حالیہ دریافت جوہانسبرگ کے قریب سوورٹکرانس کی غار سے ہوئی ہے۔