ریاض(نیوزڈیسک)سعودی عرب میں مفت کالز کرنے کے خواہشمند موبائل فون صارفین کے لئے شاندار خبر آگئی ہے ، سعودی شوریٰ نے ایسا اعلان کر دیا ہے کہ لوگوں کے دل کی بات کہہ دی ہے ۔ سعودی شوریٰ کونسل نے موبائل ایپلی کیشن ’واٹس ایپ‘کی فری کال سروسز غیر فعال کئے جانے پر کمیونیکیشن اینڈ انفارمیشن ٹیکنالوجی کمیشن کو سخت تنقید کانشانہ بنایا ہے ۔ سعودی گزٹ کے مطابق شوریٰ ممبر عبداللہ ال فیفی نے کونسل اجلاس کے دوران کہا ہے کہ کمیونیکیشن اینڈ انفارمیشن ٹیکنالوجی کمیشن صارفین کے حقوق کی حفاظت کئے بغیر ان کی جیبیں خالی کر رہی ہے ۔ انہوں نے مزید کہا کہ کمیشن ’واٹس ایپ‘پر فری سروسز کیسے معطل کر سکتی ہے؟ ٹیلی کمیونیکیشن کمپنیوں نے پہلے ہی اپنی اجارہ داری قائم کر رکھی ہے اور صارفین کی جانب سے شکایات بھی موصول ہوتی رہتی ہیں۔عبداللہ ال فیفی نے کہا کہ ٹیلی کمپنیاں دیوالیہ ہونے نہیں جا رہی بلکہ یہ کافی منافع کما رہی ہیں لہذا موبائل فون صارفین کو مزید قابل انحصار خدمات فراہم کی جانے چاہیے ۔ انہوں نے کہا کہ فون کالز کے ریٹ دنیا بھر میں سعودی عرب میں سب سے زیادہ ہیں، کمیشن شعبے میں اجارہ داری قائم کر رہی ہے اور صارفین کو کھڈے لائن لگا رہی ہے ۔ نورا ال ادوان اور دیگر شوریٰ ممبران نے بھی موبائل ایپلی کیشن ’واٹس ایپ‘کی فری کال سروسز غیر فعال ہونے پر کمیونیکیشن اینڈ انفارمیشن ٹیکنالوجی کمیشن کو آڑھے ہاتھوں لیا۔واضح رہے کہ ’واٹس ایپ ‘پر فری کال کی سہولت گزشتہ برس غیر فعال کر دی گئی تھی تاہم رواں ماہ کے شروع میں اچانک یہ سروس پھر سے بحال کر دی گئی ہے ۔رفتہ سال 15مارچ کوٹیلی کم کمپنیوں کے بڑے نقصان کے دعوے اور دباﺅ کے باعث ریاست میں’واٹس ایپ ‘سروس معطل کر دی گئی تھی ۔