اسلام آباد (نیوزڈیسک)2 رئیر کیمروں کے ساتھ اسمارٹ فونز کی تیاری کے رجحان میں اضافہ ہورہا ہے، گزشتہ دنوں ایل جی کے جی فائیو کو اس ٹیکنالوجی کے ساتھ پیش کیا جبکہ ایپل کے رواں سال ستمبر میں آنے والے آئی فون سیون پلس کے بارے میں بھی اس سے ملتی جلتی ٹیکنالوجی کے استعمال کی اطلاعات سامنے آرہی ہیں اور اب چینی کمپنی ہیواوے نے بھی اس میدان میں قدم رکھ دیا ہے۔بدھ کو لندن میں ایک ایونٹ کے دوران ہیواوے نے اپنے نئے فلیگ شپ اسمارٹ فونز 5.2 انچ کا پی نائن اور 5.5 انچ کا پی نائن پلس متعارف کرادیئے۔یہ دونوں فونز ڈوئل 12 میگاپکسز لائیسا برانڈڈ رئیر کیمروں کے ساتھ ہیں مگر چینی کمپنی نے دیگر مقابلے میں کچھ مختلف کرنے کی کوشش کی ہے۔ایک کیمرہ رنگوں کو گرفت لینے میں مہارت رکھتا ہے جبکہ دوسرا مونو کروم (وہ تصویر جس میں ایک ہی رنگ کے کئی روپ بھرے جائیں) فوٹوز لینے کے لیے بہترین ہے۔ہیواوے کے مطابق ان فونز سے لی جانے والی تصاویر میں رنگ نمایاں، زیادہ گہرائی اور تفصیل ہوتی ہے چاہے روشنی کم ہی کیوں نہ ہو۔ہیواوے نے اس اسمارٹ فون کو دیگر سے ممتاز کرنے کے لیے ایک دوسری کمپنی لائیسا کی مدد لی ہے جس کے ساتھ ملکر ان لینسز کو تیار کیا گیا۔یہ فون پتلا، اچھے ڈیزائن اور دیگر تمام ضروری فیچرز کے ساتھ ہیں اور کیمرے ہی اس کی اصل خوبی ہیں جو فون کے سسٹم کو متاثر بھی نہیں کرتے۔پی نائن میں المونیم باڈی کیس، 3000 ایم اے ایچ بیٹری، یو ایس بی سی پورٹ، تھری جی بی ریم، 32 جی بی اسٹوریج، اوکٹا کور کیرن 955 پروسیسر کے ساتھ مائیکروایس ڈی کارڈ اور ڈوئل سموں جیسے فیچرز بھی موجود ہیں۔اس کے علاوہ پی نائن پلس میں چار جی بی ریم، 64 جی بی اسٹوریج، 3400 ایم اے ایچ بیٹری کے ساتھ باقی تمام فیچر لگ بھگ پی نائن والے ہی ہیں۔اور ہاں فل ایچ ڈی اسکرین، فنگر پرنٹ اسکینر اوراینڈرائیڈ 6.0 مارش میلو بھی دونوں فونز میں موجود ہیں۔یہ فونز 16 اپریل کو یورپ اور مشرق وسطیٰ سمیت چین میں دستیاب ہوں گے، پی نائن کی قیمت 680 ڈالرز جبکہ پی نائن پلس کی 850 ڈالرز ہوگی۔