اسلام آباد(نیوز ڈیسک )سائنس اور ٹیکنالوجی کی بدولت ہماری دنیا بڑی حد تک بدل چکی ہے لیکن اب بھی بے شمار غلط باتیں عام پائی جاتی ہیں اور لوگوں کی بڑی تعداد ان پر یقین بھی رکھتی ہے۔ ایک ایسی ہی کہانی انٹرنیٹ پر عام پائی جاتی ہے جس کے مطابق اگر آپ اپنے موبائل فون کے چارجر کی تار لیموں میں لگادیں تو اس کی بیٹری چارج ہونا شروع ہوجائے گی اور اسے کسی حد تک توانائی دستیاب ہوجائے گی۔
اخبار ”ڈیلی سٹار“ کے مطابق اس مفروضے کو جانچنے کے لئے ایک تجربہ کیا گیا اور موبائل فون کو چارج کرنے کے لئے لیموں کا استعمال کیا گیا لیکن اس کہانی میں کوئی حقیقت نہیں پائی گئی۔ یہی تجربہ متعدد لیمو?ں کے ساتھ کرنے کے بعد بھی نتائج وہی کے وہی رہے، لہٰذا ثابت ہوا کہ لیموں کی مدد سے بیٹری چارج کرنے کا خواب پورا نہیں کیا جاسکتا۔
اسی طرح یہ نظریہ کہ سافٹ ڈرنکس کے ایلومینیم کین کو وائی فائی راﺅٹر کے گرد یا قریب رکھنے سے سگنل بہتر ہوجاتے ہیں بھی مکمل طور پر غلط پایا گیا۔ اس تجربے میں بھی سگنلز میں کوئی بہتری دیکھنے میں نہ آئی۔
آپ نے یہ بات بھی اکثر سنی ہو گی کہ موبائل فون کو ضرورت سے زیادہ وقت چارجر پر لگارکھا جائے تو اس کی بیٹری کو نقصان پہنچنے کا خطرہ ہوتا ہے۔ اخبار کے مطابق یہ مفروضہ بھی درست نہیں ہے۔آج کل کے جدید فونز بیٹری پوری ہونے پر خود ہی چارجنگ بند کر دیتے ہیں .البتہ اگر موبائل فون بہت لمبے عرصے، مثلاً کئی دنوں کے لئے چارجنگ پر لگارہے، تو نقصان کا اندیشہ ضرور ہے۔