اسلام آباد (نیوز ڈیسک) محکمہ موسمیات نے آئندہ 24 گھنٹوں کے دوران ملک کے زیادہ تر علاقوں میں موسم گرم اور مرطوب رہنے کی پیشگوئی کی ہے،

تاہم بالائی علاقوں کے بعض مقامات پر بارش اور تیز ہواؤں کا امکان بھی ظاہر کیا گیا ہے۔

موسمیاتی پیشگوئی کے مطابق گلگت بلتستان اور بالائی خیبرپختونخوا میں کہیں کہیں گرج چمک کے ساتھ بارش ہوسکتی ہے۔ خیبرپختونخوا کے دیر، سوات، چترال، کوہستان اور بٹگرام میں شام یا رات کے وقت چند مقامات پر بارش کی توقع ہے۔

مری، گلیات اور گردونواح میں موسم جزوی طور پر ابرآلود رہنے کا امکان ہے۔ اسی طرح جموں و کشمیر اور گلگت بلتستان میں بھی بعض مقامات پر تیز ہواؤں اور گرج چمک کے ساتھ بارش ہوسکتی ہے۔

سندھ کے بیشتر اضلاع میں گرم اور مرطوب موسم برقرار رہنے کی توقع ہے، جبکہ کراچی سمیت ساحلی علاقوں میں مطلع جزوی ابرآلود رہ سکتا ہے اور بعض مقامات پر ہلکی بوندا باندی ہونے کا امکان ہے۔

بلوچستان کے زیادہ تر علاقوں میں بھی موسم گرم اور مرطوب رہنے کی پیشگوئی کی گئی ہے، جبکہ صوبے کے ساحلی اضلاع میں آسمان پر جزوی بادل چھائے رہ سکتے ہیں۔

دوسری جانب گزشتہ 24 گھنٹوں کے دوران بھی ملک کے بیشتر حصوں میں گرمی اور حبس کی صورتحال رہی۔ تاہم پنجاب، پٹن اور گلگت بلتستان کے بعض علاقوں میں تیز ہواؤں کے ساتھ گرج چمک والی بارش ریکارڈ کی گئی۔

گزشتہ روز پنجاب میں سب سے زیادہ بارش سرگودھا میں 35 ملی میٹر ریکارڈ ہوئی، جبکہ لاہور میں 20 ملی میٹر بارش ہوئی۔

محکمہ موسمیات کے مطابق گزشتہ روز ملک کا گرم ترین مقام سبی رہا، جہاں زیادہ سے زیادہ درجہ حرارت 43 ڈگری سینٹی گریڈ ریکارڈ کیا گیا۔ دادو میں زیادہ سے زیادہ درجہ حرارت 41 ڈگری سینٹی گریڈ رہا۔