اسلام آباد (نیوز ڈیسک) پاکستان میں رجسٹرڈ افغان شہریوں کی واپسی کی حتمی تاریخ 31 اگست مقرر کر دی گئی ہے۔ وزارت سیفران نے اس سلسلے میں تمام ریکارڈ صوبائی اور ضلعی کمیٹیوں کے حوالے کر دیا ہے جبکہ بارڈر ٹرمینلز پر رجسٹریشن بند کرنے کے انتظامات مکمل کر لیے گئے ہیں اور واپسی کے خواہشمند افراد کے لیے بایو میٹرک تصدیق لازمی قرار دی گئی ہے۔تفصیلات کے مطابق پی او آر کارڈ رکھنے والے افغان باشندے 31 اگست تک وطن واپس جا سکیں گے۔

وزارت داخلہ نے اس حوالے سے ایک جامع ایکشن پلان صوبائی حکومتوں کے ساتھ شیئر کیا ہے۔ سرحدی ٹرمینلز پر افغان شہریوں کی رجسٹریشن ختم کرنے کے لیے اقدامات مکمل کر لیے گئے ہیں اور بایو میٹرک کے بغیر واپسی ممکن نہیں ہوگی۔ذرائع کے مطابق ضلعی اور صوبائی سطح پر کمیٹیاں قائم کر دی گئی ہیں جو مرکزی کنٹرول روم سے منسلک ہوں گی۔ حساس اداروں نے پی او آر کارڈ ہولڈرز کی میپنگ مکمل کر لی ہے، جبکہ افغان باشندوں کے لیے ٹرانزٹ ایریاز اور ٹرانسپورٹیشن پلان بھی تیار کر لیا گیا ہے۔رپورٹس کے مطابق مقررہ تاریخ کے بعد نادرا واپس جانے والے افغان شہریوں کی رجسٹریشن ختم کر دے گا۔ ایف آئی اے کو نامزد بارڈر کراسنگ پوائنٹس پر واپسی کے عمل کو یقینی بنانے کا کام سونپا گیا ہے، جبکہ فارن نیشنل سیکیورٹی ڈیش بورڈ اس پورے عمل کی نگرانی کرے گا۔۔