سوات(این این آئی)سوات کے علاقے منگلور میں سیلاب سے گورنمنٹ پرائمری سکول بھی شدید متاثر ہوا تاہم سکول پرنسپل کی حاضر دماغی کے باعث سیکڑوں بچوں کی جانیں بچ گئیں۔گورنمنٹ پرائمری سکول منگلور کے ہیڈ ماسٹر سعید احمد نے گفتگو کرتے ہو ئے بتایاکہ جس دن سیلاب آیا اس دن صبح قریبی ندی میں اچانک پانی کے بہاؤ میں اضافہ ہوگیا۔صورتحال کو دیکھتے ہوئے انہوں نے تمام اساتذہ کو حکم دیا کہ بچوں کو چھٹی دی جائے، اس دوران پانی سکول میں بھی داخل ہوا اور سکول کی بیرونی دیوار گرگئی۔

تاہم ہیڈ ماسٹر کے بروقت ایکشن سے اسکول میں زیر تعلیم تمام 936بچوں کو محفوظ مقام پر منتقل کردیا گیا۔سعید احمد نے کہا کہ صرف 5منٹ کے اندر پورا کول سیلاب سے متاثر ہوا اور تمام کلاس رومز اور دفاتر میں پانی بھر گیا تاہم کو ئی جانی نقصان نہیں ہوا۔ انہوں نے حکومت سے اپیل کی کہ سیلاب کے باعث متاثر ہو نے والے سکول کی فوری بحالی کے لیے اقدامات اٹھائے جائیں۔