اسلام آباد (نیوز ڈیسک) سانحہ سوات سے متعلق دائر درخواست پر پشاور ہائیکورٹ نے اپنا تحریری حکم نامہ جاری کر دیا ہے۔فیصلے کے مطابق، پروونشل انسپکشن ٹیم کے چیئرمین عدالت کے روبرو پیش ہوئے اور آگاہ کیا کہ واقعے کی تحقیقات سات روز میں مکمل کر کے ابتدائی رپورٹ عدالت میں پیش کی جائے گی۔عدالت نے ہدایت کی کہ واقعے کی مکمل تفصیلات پر مبنی جامع رپورٹ دو ہفتوں کے اندر عدالت میں جمع کرائی جائے۔
اس کے علاوہ، اداروں کی جانب سے شہریوں کے تحفظ کے لیے کیے گئے اقدامات کی تفصیل بھی رپورٹ کا حصہ ہونی چاہیے۔ ایڈووکیٹ جنرل کو بھی اس معاملے پر اپنی رپورٹ عدالت میں جمع کروانے کا کہا گیا ہے۔عدالت نے یہ سوال بھی اٹھایا کہ واقعے کے وقت موجود دو ہیلی کاپٹرز کو کیوں استعمال نہیں کیا گیا؟ اس سلسلے میں ایڈیشنل اٹارنی جنرل اور سول ایوی ایشن اتھارٹی کو بھی رپورٹ پیش کرنے کی ہدایت دی گئی ہے۔
