لاہور( این این آئی)آئندہ آٹھ روز کے دوران ملک کے بیشترعلاقوں میں مزید بارشیں متوقع ہیں،محکمہ موسمیات نے دریاں میں سیلاب ،ندی نالوں میں طغیانی اور بالائی علاقوں میں لینڈ سلائیڈنگ کا خدشہ ظاہر کر دیا۔محکمہ موسمیات کے مطابق 6 جولائی کو مغربی ہوائوں کا نیا سلسلہ پاکستان میں داخل ہونے کا امکان ہے،10جولائی تک ملک کے مختلف علاقوں میں موسلا دھار بارشیں ہوں گی،بارشوں کا موجودہ اسپیل 5 جولائی تک جاری رہے گا۔

محکمہ موسمیات کے مطابق 10 جولائی تک کشمیر،گلگت بلتستان،خیبرپختونخوا ہ اور اسلام آباد میں بادل برسیں گے،لاہور،راولپنڈی ،مری ،سرگودھا، منڈی بہا الدین،گوجرانوالہ اور ڈی جی خان سمیت پنجاب کے مختلف علاقوں میں بھی بادل رنگ جمائیں گے۔ڈپٹی ڈائریکٹرمحکمہ موسمیات عرفان ورک کے مطابق اگلے ہفتے کا آغاز ہوگا تو ایک شدید بارشوں کا اسپیل کا امکان ہے ،وہ بالائی علاقوں میں بھی ہوگا اورجنوبی علاقوں میں بھی ہوگا،اس سے مختلف علاقوں میں فلیش فلڈنگ ہوسکتی ہے،واٹر لیول ڈیمز میں بہتر ہوگا۔

موسم کی صورتحال کے پیش نظر این ڈی ایم اے نے الرٹ جاری کردیا،بالائی علاقوں میں برفانی جھیلیں پھٹنے اور لینڈ سلائیڈنگ کا خدشہ ہے،این ڈی ایم اے کے مطابق لاہور،سیالکوٹ اور نارووال میں اربن فلڈنگ جبکہ ڈیرہ غازی خان کینالوں میں طغیانی آسکتی ہے،تمام متعلقہ اداروں کوممکنہ ہنگامی صورتحال سے نمٹنے اورشہریوں کو احتیاطی تدابیر اختیار کرنے کی ہدایت کی گئی ہے۔