اسلام آباد (نیوز ڈیسک) عالمی رینکنگ میں پاکستانی جامعات کی کارکردگی مایوس کن، کوئی یونیورسٹی ٹاپ 350 میں شامل نہ ہو سکی
عالمی سطح پر جامعات کی درجہ بندی کرنے والے ادارے کیو ایس (QS) نے سال 2026 کے لیے تازہ ترین رپورٹ جاری کر دی ہے، جس میں پاکستان کی کسی بھی یونیورسٹی کو ابتدائی 350 ممتاز تعلیمی اداروں میں جگہ نہیں ملی۔
رپورٹ کے مطابق اسلام آباد کی قائداعظم یونیورسٹی کو دنیا کی بہترین جامعات میں 354ویں نمبر پر رکھا گیا ہے، جب کہ نیشنل یونیورسٹی آف سائنس اینڈ ٹیکنالوجی (نسٹ) کو 371ویں پوزیشن حاصل ہوئی ہے۔
ملک کی سب سے بڑی جامعہ جامعہ کراچی، عالمی فہرست میں 1001+ کی کیٹیگری میں شامل ہے، تاہم سندھ سے دیگر کسی جامعہ کو بھی دنیا کی 1500 بہترین جامعات کی فہرست میں جگہ نہیں مل سکی۔
رینکنگ میں پاکستان کی مجموعی طور پر 18 جامعات کو جگہ دی گئی ہے۔ ان میں قابلِ ذکر اداروں میں پنجاب یونیورسٹی کو 542ویں، لاہور یونیورسٹی آف منیجمنٹ سائنسز (لمز) کو 555ویں اور یونیورسٹی آف ایگریکلچر فیصل آباد کو 654ویں پوزیشن پر رکھا گیا ہے۔
دیگر اداروں میں:
کامسیٹس یونیورسٹی اسلام آباد – 664ویں نمبر پر
پاکستان انسٹی ٹیوٹ آف انجینئرنگ اینڈ اپلائیڈ سائنسز (PIEAS) – 721ویں نمبر پر
یو ای ٹی لاہور – 801+
یونیورسٹی آف پشاور – 901+
آغا خان یونیورسٹی – 1001+
یونیورسٹی آف مینجمنٹ اینڈ ٹیکنالوجی – 1201+
اسلامیہ یونیورسٹی بہاولپور – 1401+ درجے میں شامل ہیں۔
عالمی سطح پر ٹاپ 10 جامعات کی فہرست میں امریکہ کی میساچوسٹس انسٹی ٹیوٹ آف ٹیکنالوجی (MIT) ایک بار پھر سرفہرست ہے۔ امپیریل کالج لندن دوسرے اور اسٹینفورڈ یونیورسٹی تیسرے نمبر پر موجود ہے۔
باقی فہرست میں:
آکسفورڈ یونیورسٹی (چوتھا نمبر)
ہارورڈ یونیورسٹی (پانچواں)
کیمبرج یونیورسٹی (چھٹا)
ای ٹی ایچ زیورخ (ساتواں)
نیشنل یونیورسٹی آف سنگاپور (آٹھواں)
یونیورسٹی کالج لندن (UCL) (نواں)
کیلیفورنیا انسٹی ٹیوٹ آف ٹیکنالوجی (Caltech) (دسواں نمبر)
یہ درجہ بندی عالمی جامعات کی تحقیقی کارکردگی، تعلیمی معیار، بین الاقوامی شہرت اور صنعتی روابط کو مدنظر رکھ کر کی جاتی ہے۔
