اسلام آباد (نیوز ڈیسک)اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے خبردار کیا ہے کہ آئندہ 12 سے 24 گھنٹوں کے دوران ملک کے متعدد علاقوں میں تیز ہواؤں کے ساتھ موسلادھار بارش متوقع ہے، جس کے پیش نظر متعلقہ اداروں کو الرٹ رہنے کی ہدایت جاری کی گئی ہے۔

این ڈی ایم اے کے اعلامیے کے مطابق، اسلام آباد اور راولپنڈی میں شدید بارش اور آندھی آنے کے امکانات ہیں، جب کہ آزاد کشمیر کے مختلف اضلاع جیسے مظفرآباد، راولا کوٹ، باغ، ہٹیاں بالا، نیلم ویلی اور میرپور میں بھی خراب موسم کی پیش گوئی کی گئی ہے۔ادارے نے بتایا ہے کہ سندھ کے بڑے شہروں بشمول کراچی، حیدرآباد، سکھر، لاڑکانہ، جیکب آباد، ٹھٹہ، بدین، تھرپارکر اور میرپورخاص میں بھی آندھی اور بارش کی توقع ہے۔

خیبرپختونخوا کے علاقوں سوات، دیر، پشاور، مالاکنڈ، ایبٹ آباد، نوشہرہ، چارسدہ اور مانسہرہ میں بھی تیز ہواؤں اور گرج چمک کے ساتھ بارش متوقع ہے۔ پنجاب کے شہر لاہور، ملتان، فیصل آباد اور سیالکوٹ بھی اس موسمی نظام سے متاثر ہو سکتے ہیں۔این ڈی ایم اے نے مزید خبردار کیا ہے کہ کشمیر اور خیبرپختونخوا کے بلند پہاڑی علاقوں میں بارشوں کے باعث لینڈ سلائیڈنگ کا خدشہ موجود ہے، جس کے پیش نظر شہریوں کو احتیاط برتنے اور متعلقہ اداروں کو تیار رہنے کی ہدایت کی گئی ہے۔