ایبٹ آباد/لاہور ( این این آئی)ہزارہ ڈویژن کے سیاحتی مقام ناران سوہنی آبشار میں گلیشئر گرنے سے لاہور سے تعلق رکھنے والے 3سیاح جاں بحق ہوگئے۔پولیس ذرائع کے مطابق سیر و تفریح کے لئے آنے والے سیاح گلیشئر والی سوہنی آبشار کے قریب فوٹو سیشن کروارہے تھے کہ اچانک گلیشئر گرنے سے نیچے دب گئے۔

جاں بحق افراد کا تعلق ایک ہی فیملی سے تھا جن میں باپ بیٹا اور ایک کزن شامل ہیں، مقامی افراد اور پولیس نے جاں بحق افراد کی لاشیں ڈی ایچ کیو ہسپتال منتقل کردیں۔جاں بحق افراد کا تعلق لاہور کے علاقے ہربنس پورہ سے ہے۔وزیر اعلیٰ پنجاب مریم نواز شریف نے مانسہرہ میں کے قریب گلیشیئر گرنے سے لاہور سے تعلق رکھنے والے تین سیاحوں کے جاں بحق ہونے پرگہرے رنج اور دکھ کا اظہارکیا ہے۔ وزیر اعلیٰ مریم نواز شریف نے سوگوار خاندانوں سے دلی ہمدردی اور تعزیت کا اظہار کیا ہے۔