سرگودھا(این این آئی) مخالفین کو جھوٹے مقدمے میں پھنسانے کے لیے بیٹی کے اغوا اور اس سے جنسی زیادتی کا مقدمہ درج کروانے والے باپ کو پولیس نے گرفتار کرلیا۔پولیس ذرائع کے مطابق سرگودھا کے نواحی گاؤں چک 29 جنوبی کے رہائشی یاسین نے رواں سال 12 فروری کو تھانہ کڑانہ میں مقدمہ درج کرواتے ہوئے الزام عائد کیا کہ اس کی 18 سالہ بیٹی کو 3 افراد نے اغوا کرکے زیادتی کا نشانہ بنایا۔

پولیس نے یاسین اور اس کی بیٹی کے بیان پر 3 ملزمان کے خلاف مقدمہ درج کرکے مرکزی ملزم کو گرفتار کرلیا تھا اور متاثرہ لڑکی کا میڈیکل کرواکے ڈی این اے ٹیسٹ کے لیے لاہور لیبارٹری بجھوائے گئے جس کی رپورٹ آنا باقی تھی۔ پولیس نے جدید ٹیکنالوجی کا استعمال کرتے ہوئے واقعہ کی تمام پہلوؤں سے تفتیش کی تو پتا چلا کہ یاسین نے اپنے مخالفین کو بیٹی کے اغوا اور زیادتی کے جھوٹے مقدمہ میں پھنسانے کے لیے سارا ڈرامہ رچایا۔

لڑکی نے دوران تفتیش اعتراف کیا کہ اسے نہ تو کسی نے اغوا کیا اور نہ ہی زیادتی کی گئی ہے جس کے بعد پولیس نے یاسین کو گرفتار کرکے اس کے خلاف مقدمہ درج کرلیا۔ اس موقع پر ڈسٹرکٹ پولیس آفیسر محمد صہیب اشرف کا کہنا تھا کہ قانون کا غلط استعمال کرنے والوں کے خلاف بلاامتیاز کارروائی جاری رہے گی تاکہ بے گناہوں کو انصاف اور تحفظ فراہم کیا جا سکے۔