اسلام آباد (نوز ڈیسک) 23 سالہ راؤ طلحہ جاوید نے پاکستان کے سب سے کم عمر اسسٹنٹ کمشنر ہونے کا اعزاز حاصل کرکے نئی تاریخ رقم کر دی۔ میڈیا ذرائع کے مطابق ضلع لودھراں کی تحصیل دنیاپور سے تعلق رکھنے والے اس باصلاحیت نوجوان نے کم عمری میں یہ سنگ میل عبور کیا ہے، جو جنوبی پنجاب کے لیے ایک منفرد اعزاز کی حیثیت رکھتا ہے۔راؤ طلحہ نے اپنی ابتدائی تربیت مکمل کر کے ان لینڈ ریونیو سروس میں بطور اسسٹنٹ کمشنر اپنی ذمہ داریاں سنبھال لی ہیں۔
ان کی یہ کامیابی نہ صرف ان کے خاندان کے لیے باعثِ فخر ہے بلکہ دنیاپور اور لودھراں کے دیگر نوجوانوں کے لیے بھی حوصلہ افزائی کا باعث بن گئی ہے، جو یہ ظاہر کرتی ہے کہ مستقل مزاجی، محنت اور لگن سے ہر بڑا خواب حقیقت بن سکتا ہے۔تفصیلات کے مطابق راؤ طلحہ جاوید نے 2015 میں دنیاپور پبلک اسکول سے میٹرک کے امتحان میں نمایاں کارکردگی کا مظاہرہ کیا، 2017 میں ایف ایس سی مکمل کی، بعدازاں 2021 میں سول انجینئرنگ میں بی ایس کیا۔ محض ایک سال بعد، 2022 میں، انہوں نے پہلی ہی کوشش میں سی ایس ایس امتحان پاس کر لیا اور 51ویں کامن ٹریننگ پروگرام میں شامل ہوکر اسسٹنٹ کمشنر (ان لینڈ ریونیو) کی تربیت مکمل کی۔ بالآخر 2025 میں وہ اس عہدے پر فائز ہو گئے۔
راؤ طلحہ کی یہ کامیابی نوجوان نسل کے لیے ایک قابل تقلید مثال ہے جو ثابت کرتی ہے کہ عزم اور تعلیم کے بل بوتے پر کم عمری میں بھی بڑی ذمہ داریاں نبھانا ممکن ہے۔
