اسلام آباد (نیوز ڈیسک)اواہگہ بارڈر پر پرچم کشائی: پاکستانی عوام کی بھرپور شرکت، بھارتی جانب خامو شی ،لاہور کے واہگہ بارڈر پر پرچم کشائی کی روزمرہ تقریب میں پاکستانی عوام نے بڑی تعداد میں شرکت کی، جبکہ بھارتی سائیڈ پر غیرمعمولی خاموشی چھائی رہی۔پاکستانی جانب نہ صرف شہریوں کی بڑی تعداد موجود تھی بلکہ گورنر سندھ کامران ٹیسوری بھی تقریب میں شریک ہوئے۔
اس کے برعکس، بھارتی جانب عوامی حاضری نظر نہیں آئی، صرف چند بھارتی فوجی معمول کی ڈیوٹی پر موجود تھے۔تقریب کے دوران پاکستانیوں کا جوش و خروش دیدنی تھا۔ لوگ جذبے سے لبریز نعرے لگا رہے تھے جن میں “پاکستان زندہ باد” اور “پاک فوج زندہ باد” شامل تھے۔ شرکاء کا جوش اس بات کا عکاس تھا کہ قوم اپنی فوج کے ساتھ کھڑی ہے۔میڈیا سے گفتگو کرتے ہوئے گورنر سندھ کامران ٹیسوری نے کہا کہ واہگہ بارڈر پر پاکستانی رینجرز کی ولولہ انگیز پریڈ دیکھ کر اعتماد مزید بڑھ گیا ہے کہ ملک کا دفاع محفوظ ہاتھوں میں ہے۔
انہوں نے طنزیہ انداز میں کہا کہ پچھلی بار دشمن کو چائے پلائی گئی تھی، اب کی بار کراچی کے مشہور پان سے تواضع کی جائے گی۔انہوں نے مزید کہا کہ عالمی برادری کو یہ سمجھنا چاہیے کہ بھارت کی جانب سے نشانہ بنائے گئے مقامات شہری علاقوں پر مشتمل ہیں، اور پاک فوج نے بروقت اور جرأت مندانہ ردعمل دے کر قوم کا سر فخر سے بلند کیا۔ ان کا کہنا تھا کہ آج کی تقریب میں بھارتی عوام کی غیر موجودگی واضح پیغام دیتی ہے، اور ہم 7 مئی کو کبھی فراموش نہیں ہونے دیں گے۔
