اسلام آباد (نیوز ڈیسک) پہلگام واقعے کے بعد سکیورٹی کی صورتحال کے پیش نظر ملک بھر کے ہوائی اڈوں پر سکیورٹی کے سخت انتظامات نافذ کر دیے گئے ہیں، جبکہ بھارتی فضائی حدود سے گزرنے والی تمام غیر ملکی ایئرلائنز کی پروازوں پر کڑی نظر رکھی جا رہی ہے۔
ایوی ایشن حکام کے مطابق، لاہور کے علامہ اقبال انٹرنیشنل ایئرپورٹ سمیت ملک کے تمام اہم ہوائی اڈوں پر سکیورٹی بڑھا دی گئی ہے۔ تمام ایئر ٹریفک کنٹرول یونٹس کو ہدایات دی گئی ہیں کہ بھارتی فضائی حدود سے آنے یا جانے والی پروازوں پر خصوصی توجہ دی جائے۔
اگرچہ بھارتی ایئرلائنز پر پابندی بدستور برقرار ہے، تاہم دیگر بین الاقوامی ایئرلائنز کی سرگرمیوں پر گہری نظر رکھی جا رہی ہے۔ ائیر ٹریفک کنٹرولرز کو ہدایت دی گئی ہے کہ کسی بھی مشکوک پرواز کو بغیر ایئر ڈیفنس نمبر کے اجازت نہ دی جائے، اور ہر پرواز سے روانگی سے قبل ایئر ڈیفنس نمبر لازمی طور پر طلب کیا جائے۔
اس کے ساتھ ساتھ، ہوائی اڈوں پر تعینات تمام محکموں کے عملے کو سختی سے ہدایت دی گئی ہے کہ وہ اپنے شناختی کارڈ اور محکمانہ پاس ہر وقت اپنے پاس رکھیں۔ بغیر شناخت کے کسی بھی شخص کو ہوائی اڈے میں داخلے کی اجازت نہیں دی جائے گی۔
مزید برآں، پولیس، ایئرپورٹ سکیورٹی فورس (ASF) اور دیگر قانون نافذ کرنے والے اداروں کے درمیان سکیورٹی تعاون کو مؤثر بنانے کے لیے بھی ضروری اقدامات اٹھائے گئے ہیں، تاکہ کسی بھی ممکنہ ہنگامی صورتِ حال میں فوری اور مؤثر ردعمل دیا جا سکے۔
تمام اداروں کو ہدایت جاری کی گئی ہے کہ سکیورٹی ضوابط پر سختی سے عملدرآمد کو یقینی بنایا جائے تاکہ قومی ہوائی اڈوں کو محفوظ بنایا جا سکے۔
