اسلام آباد (نیوز ڈیسک) پاکستان نے بھارتی طیاروں کے لیے اپنی فضائی حدود کو عارضی طور پر بند کر دیا ہے، جس کا باضابطہ نوٹم (نوٹس ٹو ایئر مین) جاری کر دیا گیا ہے۔ یہ بندش 23 مئی کی رات 12 بجے تک نافذ العمل رہے گی۔

ذرائع کے مطابق روزانہ 100 سے زائد بھارتی پروازیں پاکستان کی فضائی حدود سے گزر کر اپنی منزل کی طرف روانہ ہوتی ہیں۔ ان پروازوں میں ایئر انڈیا، اسپائس جیٹ، انڈیگو، ایئر انڈیا ایکسپریس اور آکاسا ایئر شامل ہیں، جو بھارت کے بڑے شہروں جیسے دہلی، ممبئی، احمد آباد، لکھنو، امرتسر، گوا، جے پور اور چندیگر سے روانہ ہوتی ہیں۔

نوٹم کے مطابق یہ پابندی بھارت میں رجسٹرڈ تمام سول اور عسکری طیاروں پر لاگو ہوگی۔ اس کے علاوہ وہ طیارے بھی اس پابندی کے دائرے میں آئیں گے جو بھارتی ایئر لائنز کی ملکیت ہیں یا بھارت میں لیز پر استعمال ہو رہے ہیں۔

پاکستانی فضائی حدود کی بندش کے باعث بھارتی پروازوں کو متبادل راستے اختیار کرنا ہوں گے، جس سے ان کے پرواز کے دورانیے میں تقریباً دو گھنٹے کا اضافہ ہوگا۔ اس کی وجہ سے بھارتی ایئر لائنز کے یومیہ اخراجات میں لاکھوں ڈالر کا اضافہ متوقع ہے۔

تاہم، اس فیصلے سے خود پاکستان کو بھی مالی نقصان برداشت کرنا پڑے گا، کیونکہ فضائی حدود کے استعمال کی فیس سے حاصل ہونے والی آمدنی میں کمی واقع ہوگی۔