اسلام آباد (نیوز ڈیسک) ارشد خان المعروف “ارشد چائے والا”، جو چائے بناتے ہوئے وائرل تصویر کی بدولت شہرت کی بلندیوں پر پہنچے، ان کی پاکستانی شہریت کے دعوے پر اب شکوک و شبہات ظاہر کیے جا رہے ہیں۔ نادرا نے اس حوالے سے اپنی تفتیشی رپورٹ عدالت میں جمع کرا دی ہے۔

تفصیلات کے مطابق نیشنل ڈیٹا بیس اینڈ رجسٹریشن اتھارٹی (نادرا) کی جانب سے جمع کرائی گئی رپورٹ میں کہا گیا ہے کہ ارشد خان پاکستانی نہیں بلکہ افغان شہری ہیں۔ رپورٹ میں یہ بھی انکشاف کیا گیا ہے کہ ارشد خان کی جانب سے پاکستانی شہریت ثابت کرنے کے لیے فراہم کردہ معلومات میں تضاد پایا گیا۔

رپورٹ کے مطابق ارشد نے اپنے والد کی جائے پیدائش ایک جگہ سرگودھا، جبکہ دوسری جگہ اسلام آباد درج کی، جو تضاد پیدا کرتا ہے۔ اسی طرح ان کی والدہ کے نام سے متعلق بھی دی گئی تفصیلات متضاد ہیں۔

نادرا نے مزید بتایا کہ ارشد کو جو پاسپورٹ جاری کیا گیا تھا، وہ ایک درست قومی شناختی کارڈ کی بنیاد پر تھا، لیکن بعد ازاں جب اس کی تصدیق دو الگ اداروں نے کی تو بے قاعدگیاں سامنے آئیں، جس کے نتیجے میں ارشد خان کو شوکاز نوٹس جاری کیا گیا۔

عدالتی کارروائی کے دوران ارشد خان کے وکیل نے جواب داخل کرنے کے لیے مہلت طلب کی، جس پر عدالت نے کیس کی مزید سماعت 22 اپریل تک ملتوی کر دی ہے۔

یہ معاملہ سوشل میڈیا پر بھی زیر بحث ہے، جہاں صارفین ارشد خان کی شہریت کے حوالے سے مختلف آراء کا اظہار کر رہے ہیں۔