اسلام آباد(این این آئی)وزارت مذہبی امور نے رواں سال فریضہ مقدسہ ادا کرنے والے پرائیویٹ عازمین حج کیلئے ہدایات نامہ جاری کردیا۔وزارت مذہبی امور کے ترجمان کی جانب سے جاری اعلامیے کے مطابق رواں سال پرائیوٹ حج سکیم کے تحت صرف 23ہزار 620عازمین فریضہ ادا کرسکیں گے۔اعلامیے کے مطابق حج 2025کے کوٹہ، سروس پرووائیڈرز کی فہرست وزارت مذہبی امور کی ویب سائٹ اور پاک حج ایپ پر اپ ڈیٹ کر دی گئی ہے۔
عازمین کو مطلع کیا گیا کہ وہ ویب سائٹ پر رجسٹرڈ سروس پرووائیڈرز کے ساتھ بکنگ سمیت اپنی درخواست کی حیثیت اور معاہدہ چیک کریں ، اپ ڈیٹس اور معلومات کیلئے پاک حج2025موبائل ایپ کا استعمال کریں۔اعلامیے میں پابند کیا گیا کہ تمام سروس پرووائیڈرز کمپنیاں منظورشدہ کوٹہ کے مطابق عازمین حج کو اپ ڈیٹ شدہ معاہدہ (حج فارم)فراہم کریں، سعودی عرب کی تعلیمات کے مطابق (آج)18اپریل تک عازمین حج کے ویزا اجرا کے عمل کو یقینی بنائیں۔وزارت حج نے عازمین کی سہولت کیلئے لینڈ لائن نمبر 0519218571،0519207519 اور ای میل [email protected]کا اجرا بھی کیا ہے جس کے ذریعے وہ اپنی شکایات درج کرواسکتے ہیں۔
