پشاور (این این آئی) خیبرپختونخوا حکومت نے مفت سولر پینل سکیم کا آغاز کردیا ۔سکیم کے تحت صوبے میں ایک لاکھ 30ہزار گھرانوں کو مفت سولر سسٹم دیا جائے گا، احساس پروگرام ، بینظیر انکم سپورٹ پروگرام میں رجسٹرڈ مستحق گھرانوں کو سکیم میں شامل کیا گیا ہے۔پہلے مرحلے میں 32ہزار 500افراد کو بذریعہ قرعہ اندازی سولر سسٹم فراہم ہوگا، بجلی سے محروم، انتہائی متاثرہ علاقوں کو ترجیح دی جائے گی، یتیم، بیوہ، معذور افراد اور خواجہ سرائوں کو بھی سکیم میں شامل کیا گیا ہے۔

قرعہ اندازی میں نام نکلنے والے افراد کو سولر پینل، کنٹرولر، بلب، پنکھا اور بیڑی دی جائے گی۔اس حوالے سے وزیراعلی خیبرپختونخوا علی امین گنڈاپور نے کہا ہے کہ صوبے میں بجلی کے مسائل کی وجہ سے سولر سسٹم کا آغاز کیا ہے، ایک لاکھ 32 ہزار لوگوں کو فری سولر سسٹم دے رہے ہیں، ڈی آئی خان کے لوگوں نے زیادہ اپلائی کیا ہے ہم میرٹ پر سولر دینگے۔انہوں نے کہا کہ تمام ایم پی ایز کو کہہ دیا کہ قرعہ اندازی ہوگی، مقابلہ کارکردگی پر ہونا چاہیے، مقابلے میں کے پی لیڈ کرتا رہا ہے، میں کارکردگی پر سب کو چیلنج دیتا ہوں۔