اسلام آباد (نیوز ڈیسک) – رمضان المبارک جیسے مقدس مہینے میں بھی منافع خوروں کی سرگرمیاں عروج پر ہیں، جس کے باعث مرغی کے گوشت کی قیمت آسمان سے باتیں کرنے لگی ہے۔تفصیلات کے مطابق زندہ برائلر مرغی کی قیمت 490 روپے فی کلو تک پہنچ چکی ہے، جبکہ مرغی کا گوشت 850 سے 900 روپے فی کلو فروخت ہو رہا ہے۔

راولپنڈی، اسلام آباد سمیت پنجاب کے مختلف شہروں میں برائلر مرغی کی قیمت میں مسلسل اضافہ دیکھا جا رہا ہے۔ہول سیل منڈی میں برائلر مرغی کی قیمت فی من 18,800 روپے سے تجاوز کر چکی ہے۔ چند ہفتے قبل 12 سے 14 ہزار روپے فی من میں دستیاب مرغی کی قیمت میں اب 4,800 روپے کا اضافہ ہو چکا ہے، جس نے عوام کی مشکلات میں مزید اضافہ کر دیا ہے۔پہلے ہی مہنگائی کے باعث گائے، بھینس اور بکرے کا گوشت غریب عوام کے لیے خریدنا مشکل ہو چکا تھا، اور اب مرغی کا گوشت بھی عام آدمی کی دسترس سے باہر ہوتا جا رہا ہے۔ پرائس کنٹرول کمیٹیاں اور حکومتی اقدامات مؤثر ثابت نہ ہو سکے، جس پر عوام سوالات اٹھا رہے ہیں۔