لاہور( این این آئی)چیئرمین پاکستان تحریک انصاف ( نظریاتی)اختر اقبال ڈار نے شیر افضل مروت کو اپنی جماعت میں شمولیت کی دعوت دیدی۔اختر اقبال ڈار نے کہا کہ شیر افضل مروت پی ٹی آئی(نظریاتی )میں شامل ہو کر سیاست کریں۔ انہوںنے کہا کہ تحریک انصاف میں ایک ڈکٹیٹر اپنے علاوہ کسی کی مقبولیت کو برداشت نہیں کرتا،بانی پی ٹی آئی احسان فراموش،خود غرض اور ابن الوقت انسان ہیں،تاریخ گواہ ہے بانی پی ٹی آئی نے ہمیشہ پہلے لوگوں کو استعمال کیا پھر کام نکل جانے پرٹشو پیپر کی طرح پھینک دیا۔
انہوں نے کہا کہ خود کو عقل کل سمجھنے والا اپنی پارٹی میں کسی کو برداشت نہیں کرسکتا،کہنے پرتو پی ٹی آئی ایک جمہوری پارٹی مگر پارٹی میں بانی پی ٹی آئی کی ڈکٹیٹر شپ قائم ہے۔ انہوںنے کہاکہ پی ٹی آئی میں کوئی بھی بانی پی ٹی آئی کی بات کے آگے انکار نہیں کرسکتا،پی ٹی آئی میں تذلیل کرکے نکالے گئے لوگوں کی لمبی فہرست ہے،شیر افضل مروت پی ٹی آئی(نظریاتی) میں شامل ہوکر حق کی آواز بلند کریں۔
