اسلام آباد (نیوز ڈیسک)اوپن اے آئی تیزی سے مصنوعی ذہانت (اے آئی) ٹیکنالوجی میں ترقی کر رہا ہے، اور اس کے سی ای او، سام آلٹمین، کا ماننا ہے کہ مستقبل قریب میں اسمارٹ فونز کا دور ختم ہو سکتا ہے۔ایک حالیہ انٹرویو میں انہوں نے اشارہ دیا کہ اوپن اے آئی اسمارٹ فونز کے متبادل پر کام کر رہا ہے۔ ان کے مطابق، کمپنی ایک ایسی ڈیوائس تیار کرنا چاہتی ہے جو چیٹ جی پی ٹی اے آئی ٹیکنالوجی کو ہارڈ ویئر کی شکل میں صارفین کے لیے متعارف کرائے۔جاپانی میڈیا کو دیے گئے انٹرویو میں سام آلٹمین نے اس منصوبے پر روشنی ڈالتے ہوئے کہا کہ اوپن اے آئی کسی شراکت داری کے ذریعے یہ ہارڈ ویئر ڈیوائس تیار کرنے کا ارادہ رکھتا ہے۔

تاہم، یہ واضح نہیں کہ اس ڈیوائس کو کب لانچ کیا جائے گا اور صارفین اسے کب تک حاصل کر سکیں گے۔یہ خیال کہ اسمارٹ فونز کی جگہ کوئی نئی ٹیکنالوجی لے سکتی ہے، حیران کن ضرور ہے، خاص طور پر ایسی کمپنی کے لیے جس نے ابھی تک کوئی موبائل ڈیوائس نہیں بنائی۔ لیکن اگر ماضی کو دیکھا جائے تو 2007 میں ایپل نے آئی فون متعارف کرایا تھا، جس کے بعد کی پیڈ والے روایتی موبائل فونز تقریباً ناپید ہو گئے تھے۔مصنوعی ذہانت کی ترقی کے ساتھ، ایسا ممکن ہے کہ چیٹ جی پی ٹی جیسی جدید اے آئی ٹیکنالوجی نئی ڈیوائسز کو مزید کارآمد بنا دے، اور شاید مستقبل میں صارفین کو اسکرین کی ضرورت بھی نہ رہے۔

اوپن اے آئی واحد کمپنی نہیں جو اسمارٹ فونز کے بعد کے دور پر کام کر رہی ہے۔ ایپل بھی آگمینٹڈ رئیلٹی گلاسز کی تیاری میں مصروف ہے، جس کے بارے میں کہا جا رہا ہے کہ وہ آئی فون کی جگہ لے سکتے ہیں۔ تاہم، اوپن اے آئی کی حکمت عملی ایپل سے مختلف ہو سکتی ہے، اور چیٹ جی پی ٹی پر مبنی یہ نئی ڈیوائس کیسی ہوگی، اس کا انتظار باقی ہے۔