کراچی (این این آئی)کراچی میں کئی ہفتوں سے مقیم اور میڈیا کے زیربحث امریکی خاتون اونیجا اینڈریو رابنسن کو جناح اسپتال منتقل کر دیا گیا۔ ذرائع کے مطابق خاتون کی ذہنی حالت درست نہیں، وہ بہکی بہکی باتیں کر رہی ہیں جبکہ ان کے ہاتھوں اور پیروں میں سوجن بھی پائی گئی ہے۔ خاتون کو جناح اسپتال کے شعبہ نفسیات میں رکھا گیا ہے جہاں ماہر ڈاکٹر ان کا تفصیلی معائنہ کریں گے۔
خیال رہے کہ کراچی میں نوجوان سے شادی کی دعوے دار امریکی خاتون اونیجا اینڈریو رابنسن کے بیٹے جیرامیا اینڈریو رابنسن نے انکشاف کیا ہے کہ ان کی والدہ کی ذہنی حالت درست نہیں ہے۔جیرامیا اینڈریو رابنسن نے انکشاف کیا کہ انہیں میڈیا کے ذریعے معلوم ہوا کہ ان کی والدہ پاکستان میں ہیں۔ انہوں نے بتایا کہ ان کی والدہ ایک شخص اور اس کے اہلخانہ سے ملنے پاکستان آئی تھیں اور دو ہفتے بعد واپس جانا تھا، لیکن وہ واپس نہیں گئیں۔بیٹے کا کہنا تھا کہ انہوں نے اور ان کے بھائی نے والدہ کی واپسی کا ٹکٹ بھی خریدا تھا، لیکن وہ نہ آئیں۔ جیرامیا کے مطابق ان کی والدہ ذہنی مریضہ ہیں اور ان کی سوچنے اور سمجھنے کی صلاحیت متاثر ہے۔
ایک ویڈیو بیان میں خاتون نے امریکہ واپس جانے کی آمادگی ظاہر کی اور کہا کہ انہیں نیویارک جانے کے لیے ٹکٹ دی جائے کیونکہ ان کے پاس اس وقت پیسے نہیں ہیں۔واضح رہے کہ 33 سالہ اونیجا اینڈریو رابنسن، جو دو بچوں کی ماں ہیں، سوشل میڈیا پر کراچی کے 19 سالہ ندال میمن سے محبت میں مبتلا ہو گئی تھیں۔ وہ 11 اکتوبر کو کراچی پہنچیں، تاہم ندال میمن کے والدین نے اپنے بیٹے کی امریکی خاتون سے شادی کرانے سے انکار کر دیا۔امریکی خاتون کئی ماہ کراچی میں دربدر رہیں، ان کے ویزے کی مدت ختم ہو گئی تھی اور ان کے پاس واپسی کا ٹکٹ بھی نہیں تھا۔
پولیس ذرائع کے مطابق ایئرپورٹ سیکیورٹی فورس (اے ایس ایف)نے خاتون کو زبردستی کراچی میں داخل ہونے سے روک کر ایئرپورٹ پولیس کے حوالے کر دیا تھا۔کراچی کی ایک این جی او نے ان کی امریکہ واپسی کے لیے ٹکٹ اور مالی مدد بھی فراہم کی، لیکن انہوں نے واپس جانے سے انکار کر دیا اور نوجوان کے گھر کے باہر ڈیرے ڈال دیے۔
