لاہور( این این آئی) خاتون کو نوکری دینے کے بہانے قصور سے بلا کر زیادتی کا نشانہ بنا ڈالا ،پولیس نے بر وقت کارروائی کرتے ہوئے ملزم کو گرفتار کرلیا ۔ نیازی اڈا کے قریب ایک خاتون نے 15 ایمرجنسی ہیلپ لائن پر کال کر کے اپنی شکایت درج کرائی کہ وہ قصور کی رہائشی ہے اور نوکری کی تلاش میں لاہور آئی تھی ۔

متاثرہ خاتون نے بتایا کہ عمران نامی شخص نے اسے نوکری کا جھانسہ دے کر اپنے دفتر بلایا اور وہاں اس کے ساتھ زبردستی زیادتی کی۔ورچوئل ویمن پولیس اسٹیشن نے فوری کارروائی کرتے ہوئے پولیس کو موقع پر روانہ کیا اور سیف سٹی کی جدید ٹیکنالوجی کی مدد سے ملزم کی تلاش اور نشاندہی کی گئی۔ سیف سٹی کیمروں کی مدد سے پولیس نے بروقت کارروائی کرتے ہوئے ملزم کو گرفتار کر لیا۔ترجمان سیف سٹیز نے خواتین کو مشورہ دیا کہ جب بھی وہ جاب انٹرویو کے لیے جائیں تو کسی مرد سرپرست کو ساتھ لے کر جائیں۔ خواتین اگر خود کو غیر محفوظ محسوس کریں تو فوری 15 پر کال کرکے 2 دبائیں یا ویمن سیفٹی ایپ کے ذریعے بھی رابطہ کر سکتی ہیں۔