اسلام آباد (این این آئی)ازبکستان میں ملازمت کیلئے جانیوالے پاکستانیوں پر پابندی عائد کرنے کا اعلان کردیا گیا۔ رپورٹ کے مطابق بیورو آف امیگریشن اینڈ اوورسیز ایمپلائمنٹ نے ازبکستان میں ملازمت کے خواہشمند پاکستانیوں کے عمل پر عارضی پابندی کے احکامات جاری کئے ہیں۔یہ فیصلہ وزارت خارجہ کی جانب سے موصول ہونیوالی ان رپورٹس کے بعد کیا گیا جن میں کہا گیا تھا کہ ازبکستان میں مقیم پاکستانی کارکنوں کو تنخواہیں نہ ملنے اور کام کے لیے نامناسب حالات کا سامنا ہے۔
جاری اعلامئے میں ملک بھر کے تمام پروٹیکٹوریٹ دفاتر کو ہدایات جاری کی گئی ہیں کہ وہ فوری طور پر ازبکستان کے لیے مزید کارکنوں کے پروٹیکٹر روک دیں۔پروٹیکٹر بارے حکومت کا یہ حکم پہلے سے دیئے گئے اجازت ناموں اور اوورسیز ایمپلائمنٹ پروموٹرز یا براہ راست ملازمت کے خواہشمند افراد کی درخواستوں پر بھی لاگو ہو گا۔نوٹیفکیشن میں کہا گیا کہ اگر کسی ہنگامی صورت حال میں درخواست موصول ہو تو پروٹیکٹوریٹ آف امیگرنٹس متعلقہ کیس پاکستانی سفارت خانے کو بھیج سکتے ہیں لیکن اس کیلئے تمام ضروری دستاویزات اور آجر کی مکمل تصدیق حاصل کرنا ضروری ہوگا۔ سفارت خانہ کی اجازت کے بعد ہی متعلقہ درخواست پر پروٹیکٹر لگایا جائے۔
