اسلام آباد (این این آئی)پاکستان تحریک انصاف کے رہنما اور سابق اسپیکر قومی اسمبلی اسد قیصر نے کہا ہے کہ حکومت سے مذاکرات میں عمران خان اور پارٹی قیادت کی رہائی سمیت تین نکات رکھے ہیں، معاشی حالات اور امن و امان کی صورتحال کو دیکھتے ہوئے ملک کو بحران سے نکالنے کے لیے حکومت کو ایک راستہ دیا ہے، دیکھتے ہیں حکومت کتنی سنجیدگی ظاہر کرتی ہے۔ میڈیا سے گفتگو کرتے ہوئے اسد قیصر نے کہا کہ حکومت کے سامنے 3 نکات رکھے ہیں کہ ملک میں غیرقانونی اقدامات بند کیے جائیں، پی ٹی آئی کارکنوں سے جیل میں روا سلوک کا خاتمہ کیا جائے اور عمران خان، پارٹی قیادت اور کارکنوں کو رہا کیا جائے۔

انہوں نے کہاکہ رہائی کا یہ مطلب نہیں ہے کہ ہم کوئی رعایت مانگ رہے ہیں، کیوں کہ انہوں نے غیرقانونی طور پر انتقام کی بنیاد پر یہ کیسز بنائے ہیں، اس لیے جو قانون کہتا ہے اس کے مطابق کریں گے۔انہوں نے کہا کہ ہم نے مذاکرات میں اپنا موقف رکھا ہے، ہمارا ابھی بھی یہی موقف ہے کہ یہ فارم 47 کی حکومت ہے، لیکن جو بھی صورتحال ہے ہمیں اس کے مطابق آگے بڑھنا ہے۔اسد قیصر نے کہاکہ ہم نے معاشی حالات اور امن و امان کی صورتحال کو دیکھتے ہوئے ملک کو بحران سے نکالنے کے لیے حکومت کو ایک راستہ دیا ہے، دیکھتے ہیں حکومت کتنی سنجیدگی ظاہر کرتی ہے۔اسد قیصر نے سپریم کورٹ کی جانب سے ملٹری کورٹ میں سویلین کے کیسز کی اجازت دینے کے فیصلے کو افسوس ناک قرار دے دیا۔انہوں نے کہا کہ عالمی ادارے بھی ملٹری کورٹ میں سویلینز کے ٹرائل کے خلاف آواز اٹھارہے ہیں، انہوں نے واضح کیا کہ بانی پی ٹی آئی سمیت قیدیوں کی رہائی کامطالبہ کوئی رعایت نہیں ، قانونی حق مانگ رہے ہیں۔