اسلام آباد (این این آئی) وزیر دفاع خواجہ آصف نے کہا ہے کہ عمران خان کی رہائی کا کوئی امکان نہیں، اس وقت انہیں ریلیف ملنا ممکن نہیں،پی ٹی آئی راہ فرار ڈھونڈ رہی ،سرتوڑ کوششیں کر رہی ہے 24نومبر کا احتجاج نہ کرنا پڑے۔نجی ٹی وی سے گفتگو کرتے ہوئے وزیر دفاع خواجہ آصف نے کہا کہ سیاسی اور عسکری قیادت ملکی معاملات کو آگے لے کر جا رہی ہے، پی ٹی آئی اب راہ فرار ڈھونڈ رہی ہے، وہ سرتوڑ کوششیں کر رہی ہے کہ 24نومبر کا احتجاج نہ کرنا پڑے۔

انہوں نے کہا کہ علی امین گنڈاپور روز اول سے وفاقی حکومت اور اسٹیبلشمنٹ کے ساتھ رابطے میں ہیں،اسٹیبلشمنٹ کیساتھ علی امین کا رابطہ عمران خان کی مرضی سے ہے۔ انہوں نے کہاکہ علی امین گنڈاپور جلوسوں سے غائب ہو کر برآمد ہوتے ہیں،احتجاج میں دو دن باقی ہیں بہت کچھ ہو سکتا ہے۔ انہوں نے کہا کہ عمران خان کی رہائی کا فی الحال کوئی امکان نہیں، اس وقت انہیں ریلیف ملنا ممکن نہیں ہے۔ اپیکس کمیٹی اجلاس میں وزیر اعلی خیبرپختونخوا کی گفتگو بارے سوال پر خواجہ آصف نے کہاکہ اسٹیبلشمنٹ کی موجودگی میں وزیر اعلی کا لہجہ کیسا ہو سکتا ہے ؟۔

انہوں نے کہا کہ جلسے کی اجازت تو دی جا سکتی ہے مگر وفاق پر حملہ آور ہونے کی اجازت نہیں دی جا سکتی۔ انہوں نے کہا کہ عمران خان صہیونی لابی کا بندہ ہے، ان کے حق میں بیرون ممالک میں لابنگ ہو رہی ہے، پی ٹی آئی ورکرز ملک میں تباہی اور بیرونی لابنگ کی فنڈنگ کرتے ہیں۔ایک سوال پر انہوں نے کہاکہ افغانستان کی سرزمین دہشتگری کیلئے استعمال ہو رہی ہے، ہندوستان دہشتگردوں کی پشت پناہی کر رہا ہے۔