گوجرانوالہ ( این این آئی)گوجرانوالہ میں بھکاریوں نے اپنی دادی کے چہلم پر مٹن قورمہ، مربے ، بریانی جیسے شاہانہ اور پرتعیش کھانوں کے تمام ریکارڈ توڑ دئیے۔نجی ٹی وی کے مطابق گوجرانوالہ میں بھکاریوں کی دادی کے چہلم پر مہمانوں کو دئیے جانے والے کھانے کی مثال ماضی میں نہ کہیں سنی نہ دیکھی جہاں صرف مہمانوں کو پر تعیش کھانے پر لگ بھگ سوا کروڑ روپے خرچ کردئیے گئے۔
گوجرانوالہ کینٹ کے علاقہ راہوالی میں بھیک مانگنے والوں نے دادی کے چہلم پر سوا کروڑ روپے خرچ کر ڈالے ۔رسم چہلم کی تقریب میں 800بھکاریوں نے شرکت کی ،چہلم کی تقریب میں مہمانوں کیلئے ناشتے میں سری پائے جبکہ شام کے کھانے میں اڑھائی سو بکرے کے علاہ انواع اقسام کا اہتمام کیا گیا ۔کھانے میں نان، چاول، گاجر، سیب کا مربع اور تمام قسم کے مشروبات بھی پیش کیے گئے۔ مہمانوں کو پرائیویٹ مارکی میں کرسیوں پر بٹھا کر اعلی قسم کا کھانا دیا گیا۔
