راولپنڈی(این این آئی) ڈویژنل انٹیلی جنس کمیٹی کی ہدایات پر عمل کرتے ہوے راولپنڈی ڈویلپمنٹ اتھارٹی ٹاسک فورس نے غیر قانونی ہاؤسنگ سکیموں کے خلاف کارروائیاں تیز کر دیں۔ آرڈی اے انفورسمنٹ سکواڈ نے سات غیر قانونی ہاؤسنگ سکیموں جن میں پاک پی ڈبلیو ڈی ہاؤسنگ سکیم، ایگرو پارک ہاؤسنگ سکیم، گرین لیک سٹی، رائزر مارکیٹنگ، عطار فارمز، جی بی ویلی اور آرگینک میڈوز شامل ہیں جو موضع بگہ شیخاں، موضع رلہ گجراں،موضع کْڑی خدا بخش، موضع بنیاں، موضع ججا سے بڈھیال روڈ، موضع ناتھا دوال اور موضع بسنتا تحصیل و ضلع راولپنڈی میں واقع ہیں کے خلاف بھرپور آپریشن کیا ہے۔
ترجمان آر ڈی اے کے مطابق آپریشن کے نتیجے میں ان غیر قانونی ہاؤسنگ سکیموں کے مین گیٹ، سائٹ کے دفاتر ، کنٹینرز، باؤنڈری والز اور روڈ ڈیوائیڈرز کو سر بمہر اور مسمار کر دیا ہے۔ انہوں نے کہا آپریشن کی نگرانی کمشنر راولپنڈی ڈویڑن محمد عبدالعامر خٹک انجینئر، ڈائریکٹر جنرل آر ڈی اے، ایڈیشنل ڈی جی آرڈی اے، ڈپٹی کمشنر راولپنڈی اور سی پی او راولپنڈی کر رہے ہیں۔ ڈی جی آر ڈی اے کنزہ مرتضیٰ نے کہا کہ کمشنر راولپنڈی کی ہدایات پر دھوکہ دہی کی روک تھام اور شہریوں کو استحصال سے بچانے کے لیے غیر قانونی ہاؤسنگ سوسائٹیوں کے خلاف کریک ڈاؤن بھرپور طریقے سے جاری رہے گا۔ انہوں نے کہا کہ ہاؤسنگ سکیموں کے مالکان کی جانب سے زمینوں پر غیر قانونی قبضوں سے متعلق عوامی شکایات کو سنجیدگی سے لیا جا رہا ہے اور زمینوں پر زبردستی قبضہ کرنے والوں کے خلاف سخت کارروائی عمل میں لائی جائے گی۔
آرڈی اے عوام الناس کو مطلع کرنے کے لیے باقاعدگی سے پریس ریلیز جاری کرتا ہے اور شہریوں کو غیر قانونی ہاؤسنگ سکیموں میں سرمایہ کاری سے گریز کرنے کا مشورہ دیتا ہے۔ اس کے علاوہ عوام الناس کی حوصلہ افزائی کی جاتی ہے کہ وہ آر ڈی اے ویب سائٹ (www.rda.gop.pk) دیکھیں اور صرف منظور شدہ ہاؤسنگ سکیموں سے خرید و فروخت کریں۔ غیر قانونی اشتہارات، بکنگ اور ڈیویلپمنٹ کو روکنے کے لیے سابقہ وارننگ کے باوجود مذکورہ ہاؤسنگ سکیموں کے مالکان نے قواعد و ضوابط کی خلاف ورزی کرتے ہوئے بکنگ دفاتر کا کام جاری رکھا ہوا تھا۔ مشترکہ آپریشن ٹیم میں آر ڈی اے اور تھانہ روات، تھانہ مندرہ اورتھانہ کلر سیداں کے اہلکار شامل تھے۔ ٹیم کے کلیدی ارکان میں شیزا بٹ اسسٹنٹ ڈائریکٹر پلاننگ آر ڈی اے، آر ڈی اے سکیم و بلڈنگ انسپکٹرز اور ٹیم کے دیگر ارکان شامل تھے۔
