لاہور ( این این آئی) لاہور کی انسداد دہشتگردی عدالت میں جلائو گھیرائو کیس کے مقدمات میں بانی پاکستان تحریک انصاف کی عبوری ضمانتوں کی درخواست پر سماعت کے دوران اسپیشل پراسیکیوٹر رانا شکیل نے سابق وزیر اعظم کو 9مئی واقعات کا مرکزی ملزم قرار دے دیا ۔ انسداد دہشت گردی عدالت کے جج ارشد جاوید نے 9مئی جلائو گھیرائو کے 7مختلف مقدمات میں بانی پی ٹی آئی کی عبوری ضمانتوں پر سماعت کی۔دوران سماعت اسپیشل پراسیکیوٹر رانا شکیل نے بانی چیئرمین پی ٹی آئی کو 9مئی کے مقدمے کا مرکزی ملزم قرار دے دیا ۔دوران سماعت اسپیشل پراسیکیوٹر رانا شکیل نے پرائم منسٹر ہائوس جلانے کے کیس میں اپنے دلائل مکمل کر لیے، جس میں انہوں نے کہا کہ بانی پی ٹی آئی مرکزی ملزم ہے ، گواہوں کے بیانات موجود ہیں ۔
بانی پی ٹی آئی نے پارٹی کے دیگر رہنمائوں کو سرکاری تنصیبات جلانے کا کہا ہے، بانی پی ٹی آئی نے عوام کو سڑکوں پر بھی نکلنے کا کہا تھا۔ اسپیشل پراسیکیوٹر نے عدالت میں گواہوں کے بیانات پڑھ کر سنائے ۔عدالت نے استفسار کیا کہ کیا بانی پی ٹی آئی نے عوام کو اداروں کے خلاف حملہ کرنے کا کوئی ٹوئٹ کیا ، جس پر اسپیشل پراسیکیوٹر نے بتایا کہ جی ہاں بہت سے ٹوئٹس اور انسٹاگرام پر پیغامات ہیں ۔ بانی پی ٹی آئی نے عوام کو سڑکوں پر نکلنے کا کہا ۔بعد ازاں عدالت نے سماعت ملتوی کردی۔بعد ازاں عدالت نے کیس کی سماعت ملتوی کر دی ۔واضح رہے کہ عدالت نے جیل سے بانی پی ٹی آئی کی ویڈیو لنک پر حاضری لگوانے کی ہدایت کررکھی ہے اور بانی پی ٹی آئی کے وکلا سے دلائل بھی طلب کررکھے ہیں ۔بانی چیئرمین پی ٹی آئی کے خلاف جناح ہائوس ، عسکری ٹاور جلائوگھیرائو سمیت 7مقدمات درج ہیں۔
