کراچی(این این آئی) کراچی سے ایئر ٹیکسی سروس کا باقاعدہ اغاز کردیا گیاہے۔سیر و تفریح کے دلدادہ شہریوں یا ہنگامی صورتحال میں سفر کے خواہشمند افراد اب فی گھنٹہ کرائے پر ہوائی جہاز بک کرکے ملک بھر میں کہیں کا بھی سفر کر سکتے ہیں۔ابتدائی طور پر اسکائی ونگز ایوی ایشن کے تحت کراچی سے سندھ اور بلوچستان کے تمام ایئرپورٹس کیلئے ایئر ٹیکسی دستیاب ہوگی۔اسکائی ونگز ایوی ایشن کے سی ای او عمران اسلم خان کے مطابق اس آپریشن کے آغاز میں ان کے پاس 4 ایئر ٹیکسی دستیاب ہیں۔ایئر ٹیکسی پر سفر کے لیے تعارفی کرایہ 95 ہزار روپے فی گھنٹہ مختص کیا گیا ہے۔ سہولت ابتدائی طور پر سندھ بلوچستان کے ایئرپورٹس، ایئر اسرپٹس، پرائیویٹ فیلڈز کے لیے دستیاب ہے. تاہم کچھ عرصے بعد خیبر پختون خواہ اور پنجاب کے تمام ایئرپورٹس کیلئے بھی یہ سہولت دستیاب ہوگی۔
واضح رہے کہ ایئر ٹیکسی سروس میں ایک جہاز پر بیک وقت 3 افراد سفر کر سکتے ہیں۔ انتظامیہ کے مطابق ہنگامی طور پر سندھ بلوچستان کے مختلف شہروں کے لیے سفر کرنے والوں کے علاوہ ٹورزم کے حوالے سے کراچی اور گرد و نواح کا فضائی نظارہ کرنے والے شہری زیادہ تر ان سے رجوع کر رہے ہیں، جن کے لیے جہازوں کی بکنگ شروع کر دی گئی ہے۔ انہوں نے بتایا کہ کراچی سے کراچی تک کے فضائی سفر کے لیے اسکائی ونگز کی ویب سائٹ سے بکنگ کی جاسکتی ہے۔ عمران اسلم کے مطابق پاکستان میں ایئر ٹیکسی کے ذریعے سفر ایک خواب تھا جسے اب پورا کیا جا رہا ہے۔ اب کراچی کے شہری ساحل، مینگروز کے جنگلات اور کہاں کیا کچھ ہے سب دیکھ سکتے ہیں۔
