لاہور( این این آئی)پنجاب حکومت کی جانب سے لرنر ، ڈرائیونگ لائسنس اور تجدید لائسنس کی فیسوں میں اضافے کا حتمی فیصلہ کرلیا گیا جبکہ لائسنس کی فیس 5سال کی بجائے ہر سال وصول ہو گی۔ حکام کے مطابق لرنر لائسنس کی 5سال کیلئے فیس60روپے مقرر تھی جبکہ حکومت نے ہرسال 500روپے لرنرفیس مقرر کر دی ہے۔ موٹرسائیکل لائسنس کی 5سالہ فیس 550روپے تھی، اب لائسنس کیلئے ہر سال 500 روپے وصول کیے جائیں گے۔ موٹرسائیکل رکشہ کی 5سالہ فیس 550 روپے تھی، اب ہر سال500روپے مقرر کردی گئی ہے ۔

موٹرکاروجیپ کے لائسنس کی 5سالہ فیس950روپے تھی اب موٹرکاروجیپ کے لائسنس کیلئے 1800روپے ہر سال وصول کی جائے گی۔ لائٹ ٹرانسپورٹ کی 5سالہ فیس950تھی تاہم اب ہر سال2000وصول کیا جائے گا ۔ ہیوی ٹرانسپورٹ کی5 سالہ فیس 450 تھی جسے اب سالانہ 2000روپے مقر ر کر دیا گیا ہے ۔ ٹریکٹرلائسنس کی 5سالہ فیس 450تھی جسے ہر سال1000 روپے کر دیا گیا ہے ۔ کمرشل ٹریکٹر کی5سالہ فیس 450 سے بڑھا کر سالانہ 1500روپے مقرر کی گئی ہے ۔

ٹریفک پولیس حکام کے مطابق معذور افراد کے لائسنس کی 5سالہ فیس20روپے مقرر تھی تاہم اب معذور افراد کے ڈرائیونگ لائسنس کی فیس ختم کر دی گئی۔ اس کے علاوہ پبلک سروس وہیکل کی 5سالہ فیس جو450مقرر تھی اب ہرسال1500دینا ہو گا۔ باقی کیٹگریز کی ڈرائیونگ لائسنس فیس 100روپے سے بڑھا کر1000مقرر کردی گئی۔ لائسنس فیسوں میں 20سال بعد 1ہزارفیصدتک کا اضافہ کیا گیا، عوامی آگاہی کیلئے فیسوں میں اضافے کا اشتہار جلد شائع کیا جائے گا۔ یکم جنوری 2024سے پنجاب میں نئی فیسوں کا اطلاق ہو جائے گا۔