پشاور (این این آئی)پاکستان تحریک انصاف کے سینئر نائب صدر شیر افضل مروت نے کہا ہے کہ بلا پی ٹی آئی کا نشان تھا اور رہے گا۔پشاور ہائی کورٹ میں میڈیا سے گفتگو کرتے ہوئے شیر افضل مروت نے کہا کہ پرویز خٹک کے بیان کا نوٹس لینا چاہیے، بیٹ کا نشان صرف الیکشن کمیشن ہی آفر کر سکتا ہے۔انہوں نے کہا کہ بیٹ کا نشان آفر کرنے کی ضرورت کیوں تھی؟ پرویز خٹک نے تو تحریک انصاف کے مقابلے میں اپنی پارٹی بنائی ہے۔

شیر افضل مروت نے کہاکہ پرویز خٹک کے بیان سے ان کے اور الیکشن کمیشن کے تانے بانے ملتے ہیں۔پی ٹی آئی رہنما نے کہا کہ بانی پی ٹی آئی نے این اے 32 پشاور سے الیکشن کے لیے مجھے نامزد کیا تھا، اپنے حلقے لکی مروت سے بھی قومی اسمبلی کے لیے کاغذات جمع کرائے ہیں، الیکشن کہاں سے لڑنا ہے یہ فیصلہ پارٹی کرے گی۔انہوںنے کہاکہ توشہ خانہ، القادر ٹرسٹ سمیت باقی کیسز میں بھی جلد بانی پی ٹی آئی کی ضمانت ہو جائے گی، جب ایک پارٹی سے اس کا نشان لے لیا جائے تو شفاف الیکشن کیسے ہوں گے، ووٹروں سے ان کے ووٹ کا حق چھینا جا رہا ہے۔