سیہون (این این آئی)سیہون میں حضرت لعل شہباز قلندر درگاہ سے ایک کروڑ روپے سے زائد کے سونے کی چوری کا انکشاف ہوا ہے جبکہ نگراں وزیرِ اوقاف عمر سومرو نے درگاہ کے منیجر کو معطل اور مقدمہ درج کرنے کا حکم دے دیا ہے۔رپورٹ کے مطابق درگاہ سے ایک ماہ میں ایک کروڑ 23 لاکھ 72 ہزار 863 روپے کا نذرانے میں دیا گیا سونا چوری ہوا۔

ترجمان وزیرِ اوقاف کے مطابق انکوائری کمیٹی کے سامنے منیجر زبیر بلوچ نے اپنی چوری کا جرم قبول کیا ہے، زبیر بلوچ کو معطل کر کے مقدمہ درج کرنے کے ساتھ کیس اینٹی کرپشن کو بھیجنے کا حکم دیا ہے۔نگراں وزیرِ قانون عمر سومرو نے کہا کہ حضرت لعل شہباز قلندر درگاہ کے منیجر کی تنخواہ اور پنشن بھی روکنے کے احکامات دے دئیے ہیں اور اینٹی کرپشن کو لکھ دیا ہے کہ منیجر زبیر بلوچ سے گولڈ چوری کرنے کی فوراً ریکوری کی جائے۔

عمر سومرو نے کہا کہ اس کے ساتھ ساتھ تمام درگاہوں کے منیجرز کے خلاف بھی تحقیقات ہوں گی۔ذرائع کے مطابق سیکریٹری منور مہیسر نے زبیر بلوچ کو حضرت لعل شہباز قلندر درگاہ پر منیجر تعینات کیا تھا۔ذرائع کے مطابق زبیر بلوچ ریٹائرڈ ہونے کے قریب ہیں اور کئی سال سے نذرانہ باکس کی چابی اس کے پاس ہوتی ہے۔