کراچی (این این آئی) شاہ فیصل کالونی میں پولیس افسر کو فیملی کے ہمراہ لوٹ لیا گیا، ملزمان لاکھوں روپے مالیت کے طلائی زیورات لوٹ کر فرار ہوگئے۔تفصیلات کے مطابق واردات کا مقدمہ شاہ فیصل کالونی تھانے میں درج کر لیا گیا ہے، جبکہ واردات کی سی سی ٹی وی فوٹیج منظرعام پر آگئی ہے ۔تفصیلات کے مطابق پولیس افسر اپنی فیملی کے ہمراہ تقریب سے گھر واپس آرہا تھا کہ ملزمان نے گھر کی دہلیز پرواردات کی، ملزمان کے فرار ہوتے ہی پولیس آفیسر اور ملزمان کے درمیان فائرنگ کاتبادلہ ہوا، فائرنگ کے تبادلے میں،کوئی جانی نقصان نہیں ہوا۔

دوسری جانب سی ٹی ڈی نے شہر کے مختلف علاقوں میں سرچ آپریشن کے دوران 6 مشتبہ افرادکو حراست میں لے لیا ہے، ملزمان سے تلاشی کے دوران اسلحہ اور دیگر مسروقہ سامان بھی بر آمد کیا گیا ہے۔ترجمان سی ٹی ڈی کے مطابق ملزمان میں نورزادہ، قیصر، محسن شامل ہیں، تینوں مشتبہ افراد کا ریکارڈ چیک کیا جارہا ہے، سرچ آپریشن کینٹ اسٹیشن، گرومندر، پرانی سبزی منڈی اوراطراف میں کیا گیا۔