لاہور(ین این آئی)الیکشن کمیشن نے کاغذات نامزدگی جمع کرانے والے امیدواروں کے لیے ہدایات نامہ جاری کر دیا۔ جس کے مطابق قومی اسمبلی کی نشست کے امیدوار 30ہزار اور صوبائی اسمبلی کے امیدوار 20ہزار روپے فیس جمع کرائیں گے۔امیدوار کاغذات نامزدگی ساڑھے آٹھ بجے سے ساڑھے چار بجے تک جمع کرا سکیں گے۔کاغذات نامزدگی جمع کرانے کے لیے تجویز کنندہ اور تائید کنندہ کے شناختی کارڈ کی مصدقہ نقول لازمی منسلک کرنا ہو گی،تجویز کنندہ اور تائید کنندہ کا مصدقہ ووٹر سرٹیفکیٹ بھی منسلک کرنا لازمی قرار دیا گیا ہے ،امیدوار کے لئے کاغذات نامزدگی کے ہمراہ تین سال کا انکم ٹیکس ریٹرن بھی لف کرنا ہوگا ،امیدوار کے پاسپورٹ کی مصدقہ کاپی بھی کاغذات کے ساتھ منسلک کرنا ہو گی ۔
امیدوار کی کاغذات جمع کراتے وقت عمر کی حد پچیس سال سے کم نہیں ہو گی ،صوبائی اسمبلی کی نشست کے لیے امیدوار کا متعلقہ صوبے کا ہونا لازمی ہے،امیدوار کی آٹھ دسمبر 2023تک کی بینک ٹرانزیکشن کا ریکارڈ بھی لازمی دینا ہو گا۔ ہدایت نامے کے مطابق امیدوار کو کاغذات نامزدگی کے ساتھ بیان حلفی جمع کرانا بھی لازمی ہے،امیدوار کواپنے اہل خانہ سمیت زیر کفالت افراد کے اثاثوں کی تفصیلات بھی جمع کرانا ہوں گی۔کاغذات نامزدگی جمع کراتے وقت امیدوار کا مختص کردہ شخص نوٹری پبلک یا اوتھ کمشنر کے جاری کردہ لیٹر کے ذریعے بھی کاغذات نامزدگی جمع کرا سکتا ہے ۔کاغذات نامزدگی 20دسمبر سے 23دسمبر تک جمع کروائے جا سکتے ہیں،امیدوار کسی ایک حلقہ میں ایک فیس پر زیادہ سے زیادہ پانچ کاغذات نامزدگی جمع کرا سکتا ہے۔
