لاہور( این این آئی)حکومت نے بیرون ملک گھریلو ملازمت کی تلاش میں جانے والی پاکستانی خواتین کیلئے عمر کی حد میں نرمی کا فیصلہ کرلیا جبکہ شادی شدہ ہونے کی پابندی ختم کرنے پر بھی غور جاری ہے، وزارت اوورسیز پاکستانیز کی سمری کی منظوری کابینہ دے گی۔نگران وزیراعظم کے معاون خصوصی جواد سہراب کے مطابق سعودی عرب اور متحدہ عرب امارات سمیت مشرق وسطی میں ہماری خواتین کیلئے مواقع تو بے شمار مگر ان سے فائدہ اٹھانے میں پرانا قانون رکاوٹ بنا ہوا ہے، وزارت اوورسیز پاکستانیز نے دونوں شرائط میں نرمی یا مکمل خاتمے کی سمری تیار کرلی ہے اور حتمی منظوری وفاقی کابینہ دے گی۔جواد سہراب ملک نے مزید کہا کہ انشااللہ ہم اس قانون کو تبدیل کریں گے تاکہ خواتین بہتر روزگار کے لئے باہر جاکر بہتر مواقع سے فائدہ اٹھائیں۔
معاملہ کابینہ کے پاس جائے گا یا تو اس شرط کو ختم کردیں گے یا پھر کم از کم عمر کی حد 21 سال، 23 سال، 25 سال جو کابینہ طے کرے گی۔ ہماری اس کوشش کی کامیابی نہ صرف خواتین کو خود کفیل بنائے گی بلکہ اس سے ملکی زر مبادلہ ذخائر بھی بڑھیں گے۔
