اسلام آباد(این این آئی)مسلم لیگ (ن )کے قائد اور سابق وزیراعظم نواز شریف لندن سے وطن واپس آنے کیلئے اسلام آباد میں اتریں گے جہاں سے وہ براستہ جی ٹی روڈ لاہور جائیں گے۔مسلم لیگ (ن )لاہور میں اپنا مرکزی انتخابی دفتر بنائے گی۔ میڈیا رپورٹ کے مطابق یوم آزادی پر پرچم کشائی کے بعد شہباز شریف سبکدوش ہو جائیں گے۔وزیراعظم شہباز شریف آئندہ ہفتے لندن جائیں گے جہاں وہ اپنی جماعت کے قائد نواز شریف سے مستقبل کی سیاسی صورتحال کے بارے میں تفصیلی مشاورت کریں گے اور ان سے ہدایات حا صل کریں گے۔
پاکستان مسلم لیگ ن کے بعض سرکردہ رہنما بھی لند ن سے اس سفر میں ان کے ہم رکاب ہوں گے اور اس حوالے سے حد درجہ قابل اعتماد سیاسی ذرائع نے بتایا کہ اس دورے میں نوازشریف کی وطن واپسی کا نظام الاوقات طے کیا جائیگا۔شہبازشریف جو پاکستان مسلم لیگ ن کے صدر ہیں اوائل ہفتہ اعلان کر چکے ہیں کہ نواز شریف آئندہ ماہ وطن واپس آجائیں گے۔
