لاہور( این این آئی)نومئی کے واقعات کے الزام میں گرفتار تحریک انصاف کے سینئر رہنما میاں محمود الرشید کی جیل میں انتقال کی افواہ پھیل گئی ،جیل حکام کی جانب سے میاں محمود الرشید کا ویڈیو بیان جاری کرنا پڑ گیا ۔ گزشتہ روز سوشل میڈیا پر پی ٹی آئی رہنما میاں محمود الرشید کی ڈسٹرکٹ جیل لاہور میں انتقال کی خبریں گردش کرنے لگیں جس پر پہلے حکام کی جانب سے وضاحتی بیان جاری کیا یا جس میں کہا گیا کہ میاں محمود الرشید اس وقت ڈسٹرکٹ جیل لاہور میں صحت اور تندرستی کے ساتھ موجود ہیں اور انہیں تمام تر طبی سہولیات مہیا کی جا رہی ہیں۔

میاں محمود الرشید کو حکومت پنجاب کی منظوری کے بعد 22 جولائی 2023 کو پنجاب انسٹیٹیوٹ آف کارڈیالوجی ”ایکو کارڈیو گرافی”ٹیسٹ کے سلسلے میں منتقل کیا گیا تھا۔ کنسلٹنٹ پروفیسر کے معائنے کے بعد اسی دن ہی جیل واپس منتقل کر دیا گیا ہے۔ ایسی بے بنیاد اور من گھڑت خبروں کے ذریعے حکومت پنجاب اور محکمہ جیل خانہ جات پنجاب کو بدنام کرنے کوشش کی جا رہی ہے۔محکمہ جیل خانہ جات کی جانب سے میاں محمود الرشید کا اپنا بھی ویڈیو بیان جاری کیا گیا جس میں انہوں نے بتایا کہ 22جولائی کو میرا پی آئی سی میں ٹیسٹ ہوا تھا ، میں 23جولائی شام چھ بجے کیمپ جیل میں خیریت سے ہوں ۔