اسلام آباد(این این آئی)امریکی صدر جو بائیڈن کے مشیر برائے آرٹس شاہد احمد خان نے کہاہے کہ امریکی انتظامیہ کو پاکستان کی داخلی سیاست سے کوئی سروکار نہیں ہے۔ٹی وی پروگرام میں گفتگو کرتے ہوئے امریکی صدر جو بائیڈن کے مشیر برائے آرٹس شاہد احمد خان نے کہاکہ امریکی سینیٹرز نے چیئرمین پاکستان تحریک انصاف (پی ٹی آئی)کی ذات کے لیے نہیں بلکہ انسانی حقوق کے حوالے سے ایک عمومی خط لکھا تھا۔شاہد احمد خان نے کہاکہ امریکی سینیٹرز کا خط اگر اتنا اہم ہوتا تو پاکستان کو آئی ایم ایف کی امداد نہ مل پاتی۔
امریکی صدر کے مشیر نے کہاکہ چیئرمین پی ٹی آئی کا سائفر ڈرامہ دنیا میں پاکستان کی جگ ہنسائی کا سبب بنا۔یاد رہے کہ چیئرمین پی ٹی آئی عمران خان نے اپنی حکومت کے آخری دنوں میں ایک جلسے کے خطاب کے دوران ایک خط لہرا کر اسے مبینہ امریکی دھمکیوں پر مشتمل سائفر قرار دیتے ہوئے کہا تھا اس میں امریکی سفیر کی جانب سے پی ٹی آئی حکومت کو گھر بھیجنے کی دھمکی دی گئی ہے تاہم سابق وزیراعظم نے یہ مبینہ سائفر آج تک کسی کو نہیں دکھایا۔اس خط کے حوالے سے سابق وزیراعظم عمران خان کے پرنسپل سیکرٹری اعظم خان بھی مجسٹریٹ کے روبرو اپنا بیان ریکارڈ کروا چکے ہیں جس میں انہوں نے سائفر کو ڈراما قرار دیتے اسے سیاسی مقاصد کے لیے استعمال کرنے کا اعتراف کیا۔
