لاہور( این این آئی)صوبائی دارالحکومت کے علاقہ بھاٹی گیٹ کے نور محلہ میں آتشزدگی کے نتیجے میں ایک ہی خاندان کے 10 افراد جاں بحق ہو گئے ، جاں بحق ہونے والوں میں بچے اور خواتین بھی شامل ہیں، گھر کی تین منزلیں آتشزدگی کی لپیٹ میں آ گئیں ، اطلاع ملتے ہی ریسکیو ٹیمیں موقع پر پہنچ گئیںجنہوں نے آگ پر قابو پانے کے بعد لاشوں کو مردہ خانے منتقل کیا ، نگران وزیر اعلیٰ پنجاب محسن نقوی نے آتشزدگی کے واقعہ میں 10افراد کے جاں بحق ہونے کے واقعہ پر افسوس کا اظہار کرتے ہوئے کمشنر لاہور ڈویژن سے رپورٹ طلب کر لی۔
بتایا گیا ہے کہ بھاٹی گیٹ کے علاقہ نور محلہ میں ظہیر الدین بابر نامی شخص کے گھر کے اندر مبینہ طور پر فریج کو لگے سٹیبلائزر میں آگ لگ گئی جس نے گھر کی تین منزلوں کو اپنی لپیٹ میں لے لیا ۔ اطلاع ملتے ہی پولیس ،ریسکیو 1122 اور فائر بریگیڈکی گاڑیاں موقع پر پہنچ گئیں اور امدادی کارروائیاں شروع کر دی گئیں ۔بتایا گیا ہے کہ آگ لگنے سے عمارت میں موجود تمام لوگ پھنس گئے اور آگ لگتے ہی فیملی کے تمام افراد نے خود کو مکان کے پچھلے کمرے میں بند کر لیا تاہم آگ نے انہیں اپنی لپیٹ میں لے لیا ۔
ایدھی ترجمان اور اہل علاقہ کے مطابق جاں بحق ہونے والوں میں 60 سالہ سائرہ بانو، فرزانہ،امبر،غزل فاطمہ،18 سالہ ثانیہ ،16 سالہ عادل ،4 سالہ انزل فاطمہ 13 سالہ سمیاب ،مانو اور7 ماہ کا علمدار شامل ہیں۔امدادی ٹیموںنے متاثرہ گھر سے لاشیں نکالنے کے بعد مردہ خانے منتقل کر دیں ۔نگراں وزیر اعلیٰ پنجاب محسن نقوی نے گھر میں آگ لگنے سے 10 افراد کی ہلاکت پر افسوس کا اظہار کرتے ہوئے لواحقین سے دلی ہمدردی کا اظہار کیا ہے ۔محسن نقوی نے آگ لگنے کے واقعے کی جامع تحقیقات کا حکم دیتے ہوئے کمشنر لاہور سے رپورٹ طلب کر لی ۔
