لندن (این این آئی)رہنما استحکام پاکستان پارٹی عون چوہدری بھی پارٹی کے پیٹرن ان چیف جہانگیر ترین سے ملاقات کے بعد دبئی چلے گئے جہاں وہ آصف علی زرداری اور نواز شریف کو جہانگیر ترین کا اہم پیغام پہنچائیں گے۔لندن سے دبئی کیلئے روانگی سے قبل میڈیا سے گفتگو کرتے ہوئے عون چوہدری نے کہاکہ جہانگیر ترین کے خلاف گھناؤنی سازش کے مرکزی کردار چیئرمین پی ٹی آئی اور ثاقب نثار تھے۔

انہوں نے کہا کہ اہم شخصیت نے جہانگیر ترین کے خلاف سازش میں چیئرمین پی ٹی آئی اور ثاقب نثار کے ملوث ہونے کی تصدیق کی۔عون چوہدری نے کہا کہ چیئرمین پی ٹی آئی نے غیرقانونی اور غیر اخلاقی بنیادوں پر جہانگیر ترین کو قربانی کا بکرا بنا کر اپنے اقتدار کی راہ ہموار کی۔انہوں نے کہا کہ ثاقب نثار اور چیئرمین پی ٹی آئی نے جہانگیر ترین کے ساتھ ایسا ظلم کیا جیسا نواز شریف کے ساتھ ہوا تھا۔

رہنما آئی پی پی نے کہا کہ اللہ کا شکر ہے کہ اب جہانگیر ترین انتخابی سیاست کیلیے اہل ہوگئے ہیں۔عون چوہدری نے کہاکہ چیئرمین پی ٹی آئی کو چیلنج کرتا ہوں حلفا بتائیں انہوں نے کیا ثاقب نثار کے ساتھ مل کر سازش نہیں کی؟انہوں نے کہا کہ کیا وہ بتا سکتے ہیں کہ جہانگیر ترین کی ریویو پٹیشن مسترد کروانے میں ان کا کیا کردار تھا؟انہوں نے کہاکہ شواہد موجود ہیں کہ جہانگیر ترین کی ریویو پٹیشن سپریم کورٹ سے مسترد کروانے میں بھی چیئرمین پی ٹی آئی کا ہاتھ تھا۔

عون چوہدری نے کہا کہ عملیات اور خوابوں کے نتیجہ میں مجھے وزیراعظم کی تقریب حلف برداری میں شرکت سے روکا گیا۔ عملیات کی بنیاد پر جہانگیر ترین کو انتخابی سیاست سے فارغ کروایا گیا۔انہوں نے کہاکہ نتیجہ چیئرمین پی ٹی آئی کے سامنے ہے، ان کے مشیر اور قریب رہنے والوں نے ٹکٹوں کیلئے پیسے پکڑے۔انہوں نے بتایا کہ جہانگیر ترین تین دن بعد واپس لاہور پہنچ جائیں گے جبکہ دبئی میں اہم ملاقاتوں میں شرکت کے بعد میں بھی لاہور جاؤں گا۔

موضوعات:عون چوہدری