دبئی(این این آئی)پیپلز پارٹی نے (ن)لیگ سے پنجاب سمیت دیگر صوبوں میں سیٹیں مانگ لیں۔دبئی میں پاکستان پیپلز پارٹی اور پاکستان مسلم لیگ (ن)کے درمیان گزشتہ روز ہوئی ملاقات میں کیا بات ہوئی اور آئندہ ہونے والی ملاقاتوں میں کیا ہونے والا ہے اس حوالے سے اندرونی کہانی سامنے آگئی اس حوالے سے ذرائع نے بتایا کہ پیپلز پارٹی نے ن لیگ سے پنجاب سمیت دیگر صوبوں میں سیٹیں مانگ لیں۔
نجی ٹی وی کے طابق گیلانی خاندان، پرویز اشرف، قمر زمان کائرہ، ندیم افضل چن اور کچھ دیگر افراد کے حلقوں میں ن لیگ اپنے امیدوار کھڑے نہیں کرے گی۔ن لیگ کے ذرائع کے مطابق وزیرِ اعظم شہباز شریف بھی لندن سے دبئی پہنچیں گے، جو میٹنگ میں موجود ہوں گے۔ذرائع نے بتایا کہ دبئی میں ہونیوالی ملاقات میں نگراں وزیرِ اعظم کا نام بھی فائنل کیا جائے گا، الیکشن کی تاریخ بھی اسی ملاقات کے دوران دونوں جماعتیں فائنل کریں گی۔
ذرائع کے مطابق دبئی میں ان ملاقاتوں میں اسمبلی کی مدت پوری ہونے سے پہلے اسمبلی توڑنے کے معاملے پربھی غور کیا جائے گا، اسمبلی وقت سے پہلے توڑنے سے الیکشن مہم کے لیے وقت مل سکے گا۔ذرائع نے بتایا ہے کہ ن لیگ کے کچھ مزید رہنما میٹنگ میں شرکت کے لیے دبئی جائیں گے۔ذرائع نے بتایا کہ دبئی میں دونوں جماعتوں کے درمیان اس پر بھی بات ہو گی کہ استحکامِ پاکستان پارٹی اور ق لیگ کو کتنی سیٹوں پر ایڈجسٹ کرنا ہے۔
